【娛樂人物】難忘陪哥哥最後一跑 周董F4約旦大整蠱 Stanley超級巨星守護人 屹立37年

更新時間 (HKT): 2021.05.03 02:00

觀眾看到舞台上的星光閃耀,卻忽略經常出現於巨星身旁的一雙有力的手。

許頌昇(Stanley)是娛樂圈首屈一指的元祖G4,1984年入行做保安員,後來專責做演唱會、名人明星的保安,由張國榮年代到現在的人氣王姜濤,在行內屹立至今37年。他日前接受《蘋果》訪問,細訴與哥哥張國榮建立的情誼,尤其難忘在哥哥身故當夜,他整晚陪伴唐鶴德,以及哥哥出殯當天,他陪着靈車跑的最後一段路,之後與唐唐抱頭痛哭。Stanley記憶猶新的還有16年前,他陪同九位巨星到約旦拍廣告,遭周杰倫及F4大整蠱的有趣經歷。

撰文:余燕儀

到過紅館睇騷的歌迷相信都會見過許頌昇,每當歌手走近觀眾席握手,他就會跟在身後攬腰護駕,以防歌手被歌迷拉倒受傷,曾被他攬過腰的歌手粒粒巨星,包括張國榮、梅艷芳、張學友、劉德華、許冠傑等。Stanley位於荃灣的辦公室內,牆上貼滿近千個演唱會工作證,蔚為奇觀。

回憶曾為多位巨星提供服務,Stanley直言交情最深的是張國榮(哥哥),「好多謝哥哥,我入行只係20歲多啲,同𠵱家比經驗差好遠,但哥哥冇嫌棄一個咁嘅𡃁仔,佢唔單止起用我、包容我,好多嘢係佢教我,譬如同佢出去食飯,餐桌禮儀佢會提點我,去到外地工作,英文講得唔太對,佢會指正我,我因為家庭上嘅事同佢傾偈,佢會畀到好好意見。有晚佢問我有冇諗過移民?當時97關係,佢話喺新加坡有朋友開公司,可以叫朋友聘請我去嗰邊做嘢搞移民,佢好關心人。」

持靈堂鎖匙抱唐唐痛哭

從哥哥首個到最後一個紅館騷,都是Stanley做保安,2003年4月1日哥哥離去那天發生的事,Stanley仍然記得,「傍晚時分陳太畀電話我,話哥哥出咗事,即刻過嚟瑪麗醫院,開車過去時,好多傳媒、藝人打畀我,問哥哥係咪出咗事,但礙於職業操守,只能扮若無其事。」當晚飛車去到醫院,他見到陳太和唐鶴德,知道哥哥走了,「當時一片空白,諗唔到嘢。」送唐唐返加多利山後,他整晚留在哥哥家,好多朋友都留下陪唐唐。直至哥哥舉殯,Stanley全程負責喪禮保安,「殯儀館提供咗一個禮堂,將哥哥遺體放喺裏面,鎖匙由我一個人keep住,每日唐生嚟睇哥哥先打畀我,然後我攞鎖匙去開門,唐生離開就鎖門。道門我哋用鐵鏈同自己鎖頭鎖咗,連殯儀館都唔會開到。」

唐唐知Stanley跟哥哥交情深,很信任他,不但將靈室的鎖匙給他保管,更讓他瞻仰哥哥遺容,「當時哥哥大殮,我喺殯儀館附近處理公仔,唐生專登搵人叫我等埋我上嚟,哥哥先至入殮。」當哥哥出殯時,Stanley陪着靈車跑了一段路,親送哥哥最後一程,「好多人問過我點解有咁舉動,老實講我都唔知,只係諗住呢程係哥哥最後一程,再冇機會,我有需要喺隔鄰做一個保護。」儀式完成後,Stanley護送唐唐返加多利山,「返到屋企真係忍唔住,大家抱頭痛哭。」

原來,Stanley亦早知哥哥有抑鬱症,「喺佢去之前兩個月,我同佢喺麗晶酒店飲茶,佢有同我講佢嘅狀況,話自己呢輪好唔妥當。」哥哥走了18年,Stanley依然十分掛念,哥哥曾鼓勵他開公司,「後期我離開公司,同其他公司合作成立一個部門叫Stanley team,當時哥哥講笑話,你真係寸。」

陪跑步獲發哥推拿醫傷

有人以為保安酬勞很高,有傳梁朝偉和劉嘉玲2008年的不丹婚禮,花30萬請Stanley team維持秩序,他反駁︰「呢啲係銀碼上炒作,我哋唔會因為客戶身份,收費去到天價。」紅星藝人到外地工作,都要聘請保安,Stanley曾跟周潤發到敦煌拍戲,那次他帶傷開工,「當時發哥係唔知我有腳傷,到第一日朝早陪佢晨跑,佢見我紮咗護膝,問我點解,至知道我有腳傷,於是佢就好耐心教我腳傷嘅跑法,同埋刻意放慢腳步傍住我跑,跑完更會幫我推拿治傷,搞到我都非常唔好意思,返到嚟香港,佢仲介紹咗個相熟嘅醫生畀我。」

37年工作經驗,最印象深刻是2004年到約旦,「當時飲品喺約旦拍廣告,陣容好誇張,郭富城、鄭秀文、陳冠希、周杰倫、蔡依林、F4,派咗十幾人(保安)過去,好考驗合作性同紀律性,因為有傳媒跟過去,我哋要做保密工夫,運送藝人令造型唔曝光。試過被周董整蠱,有日周董突然間同F4嘈起上嚟,嘈到擲嘢互鬧,大家喺度勸交,阿王(郭富城)都問乜事唔好咁,後來吳建豪偷笑,我哋先知中計。」

Stanley的保安工作往往夾在傳媒、fans和藝人之間變磨心,最壞情況是fans被阻接觸偶像,保安變了出氣袋,「fans遷怒我哋,譬如會話保安非禮佢哋,試過報警,後來同fans多咗溝通,近年絕少發生呢啲情況。」

娛聞樂陪你走遍全球追星,即Like「娛果」FB 專頁!
BannerBanner