專訪丨藝人保安Stanley揭37年工作秘辛 追靈車護送張國榮最後一程盡情義

更新時間 (HKT): 2021.05.03 00:00

他沒有6呎高,卻是娛樂圈首屈一指的元祖G4,無論紅館、殯儀館、機場、婚宴、頒獎禮、大型宣傳活動……都會見到一身黑look的他,「我係Stanley,1984年入行做保安,後來專責做演唱會、演藝活動、藝人名人保安,到而家已經37年。」由張國榮年代到現今的人氣王姜濤,都是由Stanley(許頌昇)負責保安。

如果大家有去紅館睇騷,相信都會見過Stanley,每當歌手走近觀眾席握手,他就會跟在身後護駕攬腰,以防歌手被歌迷拉倒受傷,曾被他攬過腰的歌手,就有張國榮、梅艷芳、張學友、劉德華、許冠傑、鄭秀文、郭富城等粒粒巨星。他位於荃灣的辦公室房內,有一面牆貼滿近1,000個演唱會工作證,十分壯觀。紅館彷彿是他的第二個家,早前演唱會重開,Stanley便負責樂隊RubberBand紅館騷的保安,工作程序嚴謹,「檢查舞台同台邊欄杆,係每日必要工序,以確保藝人同觀眾安全。」每晚到紅館後,他都要跟團隊briefing,依據當天節目rundown變動或要特別注意事項,安排保安員擺位和工作分配。

Fans遷怒保安指控非禮

在保安界立足37年的Stanley,看盡娛樂圈人生百態,往往夾在傳媒、fans和藝人之間變磨心,「外邊有啲人誤會,我哋唔係要同fans甚至傳媒對立,我哋工作係提供安全環境,畀fans同偶像有安全接觸、畀傳媒交差。咁多年,我奉行一樣嘢——最好安排,最壞打算。」在最壞的打算下,曾發生最壞的情況,fans被阻接觸偶像,保安變了出氣袋,「fans難免會遷怒於我哋,譬如會話保安非禮佢哋,試過搞到報警,後來同fans多咗溝通,大家知道底線,近年唔多發生呢啲情況。」

入行多年,他見盡歷代巨星的興替,由80年代的張國榮到現在的人氣王姜濤,他遇過最混亂的情況,卻是當年紅爆東南亞的台灣F4,「F4係最混亂,要4、50人做接送機,佢哋唔單止香港,試過同佢哋出埠去東南亞、泰國都係咁瘋癲,好多時藝人都想喺正常通道出入,所以要安排好少少,避免混亂情況。有時機管局主動提供秘道,但其實秘道一啲都唔秘,只不過對公眾影響會減到最低。」

感激張國榮冇嫌棄𡃁仔

Stanley曾為多位巨星提供服務,交情最深的是張國榮(哥哥),「好多謝哥哥,我入行只係20歲多啲,同而家比經驗差好遠,但哥哥冇嫌棄一個咁嘅𡃁仔,佢唔單止起用我、包容我,好多嘢係佢教我,譬如同佢出去食飯,餐桌禮儀佢會提點我,去到外地工作,英文講得唔太對,佢會指正我,我家庭上同佢傾偈,佢會畀到好好意見。有晚佢問我有冇諗過移民?當時啱啱97關係,佢話喺新加坡有朋友開公司,可以叫朋友聘請我去嗰邊做嘢搞移民,佢係會關心人去到咁嘅程度。」

哥哥由第一個紅館騷,到最後一個紅館騷,都是由Stanley做保安,2003年4月1日哥哥離去那天,Stanley接到陳淑芬的電話趕到瑪麗醫院,「記得傍晚時分,陳太畀電話我,話哥哥出咗事,即刻過嚟瑪麗醫院,喺我開車過去嘅同時,好多傳媒行家甚至藝人都打畀我,問哥哥係咪出咗事,大家都知我同哥哥關係好好,因為礙於我嘅職業操守關係,只能扮到若無其事。」

當晚飛車去到醫院,Stanley見到陳太和唐鶴德,知道哥哥走了,「當時一片空白,諗唔到嘢。」之後Stanley送唐唐返加多利山,整晚都留在哥哥家中,好多朋友都留下陪唐唐。直至哥哥舉殯,Stanley全程負責喪禮保安,「殯儀館提供咗一個禮堂,將哥哥遺體放喺裏面,鎖匙由我一個人keep住,每日唐生嚟睇哥哥先打畀我,然後我攞住鎖匙去開門,直到唐生離開鎖門。道門我哋用鐵鏈同自己鎖頭鎖咗,連殯儀館都唔會開到。」

唐唐知道Stanley跟哥哥交情深,很信任他,不但將靈室的鎖匙給他保管,更讓他瞻仰哥哥遺容,「當時哥哥大殮,我喺殯儀館附近處理公仔,唐生專登搵人叫我,等埋我上嚟,哥哥先至入殮。」當哥哥出殯時,Stanley陪着靈車跑了一段路,親送哥哥最後一程,「好多人問過我點解有咁舉動,老實講我都唔知,只係諗住呢程係哥哥最後一程,再冇機會,我有需要喺隔鄰做一個保護。」儀式完成後,Stanley護送唐唐返加多利山,「返到屋企真係忍唔住,大家抱頭痛哭,可能嗰幾日太過集中做好件事,冇時間諗呢啲,反而完晒成件事,有咁嘅反應。」

原來,Stanley亦早知哥哥有抑鬱症,「喺佢去之前,我諗兩個月前,我同佢喺麗晶酒店飲過茶,佢有同我講佢嘅狀況,話自己呢輪好唔妥當。」哥哥走了18年,Stanley依然十分掛念,「哥哥曾經同我講過,『你而家打人工,有冇諗過有自己公司?』後期我離開原本公司,同其他公司合作成立咗一個部門,唔知叫乜名,就叫Stanley team,當時哥哥講笑話,你真係寸。」

獲發哥推拿治傷

90年代初,Stanley team幾乎被人吞併,後來Stanley自立門戶,成立「星衛」保安公司,「公司名有特別意思,專為star做保安,我亦希望自己成為保安裏面嘅star。」由一名保安員做到老闆,成績有目共睹,當年黃霑曾在節目上,讚Stanley是行內精英,「做得一份job,最基本要專業,好多人話保安係唔受尊重行業,更加應該尊重自己,令到人哋尊重。」

有人睇唔起保安,但羨慕他們可以近距離接觸明星,又八卦酬勞是否很高,有傳梁朝偉和劉嘉玲不丹婚禮,花30萬請Stanley team維持秩序,李嘉欣嫁入豪門一億婚禮,有10萬用在保安費上,「呢啲銀碼上係炒作,我哋唔會因為客戶身份決定銀碼,收費唔會去到天價,衰啲講句,冇你唔得咩。」紅星藝人到外地工作,都要聘請保安,工作會比在香港繁重,包括事前的場地勘察、確定交通安排、與下榻酒店溝通藝人出入路綫、檢查藝人房間,以確保安全等。Stanley更曾跟周潤發到敦煌拍戲,那次他帶傷開工,「當時發哥係唔知我有腳傷,到第一日朝早陪佢晨跑,佢見我紮咗護膝,問我點解,知道我有腳傷,於是佢就好耐心教我腳傷嘅跑法,同埋刻意放慢腳步傍住我跑,跑完更會幫我推拿治傷,搞到我都非常唔好意思,跟住佢跑咗幾朝,腳傷亦有明顯改善。返到嚟香港,佢仲介紹咗個相熟嘅醫生畀我。」

37年工作經驗,最印象深刻是2004年到約旦,「當時有飲品喺約旦拍廣告,陣容好誇張,郭富城、鄭秀文、陳冠希、周杰倫、蔡依林、F4,呢個job叫做九星連珠,派咗十幾人(保安)過去,好考驗合作性同紀律性,因為有傳媒跟咗過去,我哋要做保密工夫,記得攞好大張波斯地毯圍住,運送藝人令造型唔曝光。咁多日藝人悶悶哋,試過被周董整蠱,有日周董突然間同F4嘈起上嚟,嘈到擲嘢互鬧,大家喺度勸交,阿王(郭富城)都問乜事、唔好咁,後來吳建豪偷笑,我哋先知中計。」

對員工有三不要求

做了老闆後,Stanley以身作則,對同事亦有三不要求,「唔准搵藝人影相、唔准攞簽名,唔准攞粉絲送畀藝人禮物,呢啲喺我公司係死罪,一做即炒。」經常與藝人接觸,能否做到朋友,「我唔敢高攀係朋友,我立場做得專業,主係主,僕係僕,其實呢個行業,真係要有奴性,所謂奴性唔係叫你拍馬屁擦鞋,奴性係甘於去serve,所謂服侍當然係合理情況下,做好工作。」

一場社會運動和肺炎疫情,令娛樂圈幾乎停擺,保安工作亦大受影響,「生意少咗超過九成幾,呢年幾兩年,我哋做得最多反而係喪禮,何鴻燊、錢國偉……30幾年未放過悠長假期,當放吓假。」公司員工包括全職及兼職,大約有百多人,雖然如此,但Stanley沒有減薪裁員,「如果我作為一個老闆,都覺得艱難嘅時候,員工仲艱難,我仍然頂得順情況下,維持唔好變,佢哋都要生活,出面風大雨大去得邊。暫時應付到,希望一路一路好,開返騷,大家順利。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner