【娛樂人物】遭杜琪峯鬧垃圾 捱到心臟病發 林雪吃得苦中苦

更新時間 (HKT): 2021.05.04 02:00
■林雪日前接受《蘋果》專訪,親述當初入行由場務做到最佳男配角的經歷。

林雪向來善演小人物,不過最近他在新作《真.三國無双》中,飾演一代梟雄董卓,造型及演技入形入格。日前他接受《蘋果》專訪,親述當初入行由場務做到最佳男配角的經過,自小家道中落的他在逆境成長,形成「罵不還口、打不還手」的性格,不過最難忘是被恩師杜琪峯鬧「垃圾」,為此他反而更博盡,更因此心臟病發。

撰文︰祖李

現年56歲的林雪在新作《真.三國無双》中飾演霸氣梟雄董卓,更艷福無邊,不過,他日前接受《蘋果》專訪,坦言這次是他近年最辛苦的古裝戲,更因此扭傷了腰︰「拍嗰陣喺暑假,穿上盔甲入面已經濕晒,你再騎馬拍打戲,個人會虛脫,上馬嗰陣chok親條腰,雖然係痛,但我盡量頂。」

「我盡量頂。」仿似林雪入行三十多年的座右銘,多年來他在影圈做盡丑角,不過「最難啃」還是1991年,他在電影《力王》做打手,但被臨時拉扶做怪獸,拍攝時要穿上厚厚的道具衣,浸在一盆臭豬肉內︰「一啲都冇誇張,真係喊㗎!為咗生活,嗰陣得280蚊一組,但做怪獸4,000蚊一個鐘喎!梗係做啦!」

抵得諗受重用

可能因為抵得諗,由場務做起的林雪獲導演杜琪峯提攜,1999年憑參演杜Sir電影《鎗火》,入圍金像獎及台灣金馬獎最佳男配角,其後憑2004年的《PTU》獲得金紫荊獎最佳男配角及再次提名金馬獎最佳男配角、2017年憑《樹大招風》則獲得亞洲電影大獎最佳男配角,齣齣皆出自杜Sir手筆。林雪對杜Sir感恩敬重,不過提到最難忘,卻是2009年拍電影《復仇》時被杜Sir鬧他「垃圾」︰「嗰陣同個法國演員Johnny Hallyday第一日拍就要背英文,意思同語氣我都唔識,死背咗幾次都唔得,俾佢鬧到我……直情鬧我垃圾、爛泥。佢鬧你係愛之心,覺得你一定做到,做唔到?你咪垃圾囉!」

雖然被鬧垃圾,但林雪懂得調整心態︰「嗰陣我諗︰你X咪由你X,我有我做,日日俾你X我都唔識咪大鑊。佢係攞我嚟殺雞儆猴,好啦!俾你鬧啦,你又唔會打我嘅!」話雖如此,為拍好這齣戲,林雪應杜Sir要求,在其中一幕追逐戲博到盡,最終令林雪心臟病發倒地,被送到醫院檢查。當時林雪說:「係自己衰嘅,又唔理自己身體狀況,杜Sir勸過我好多次要減肥又冇聽。」林雪直言被杜Sir鬧受益匪淺︰「佢鬧你都係想你好,睇嘢要睇兩面,佢唔鬧我𠵱家我可能出去俾其他導演X,係咪?」

愛扮演黑社會

林雪罵不還口,打不還手的性格是他的生存之道,15歲他家道中落,從天津來港住木屋,因此思想比同齡人成熟,他說︰「比起同年紀小夥伴,我諗嘢多過佢哋,想要嘅多過佢哋,所以我一定要勤力過佢哋至得,嗰陣真係好辛苦,由內地嚟香港,廣東話唔識講,喺竹園住木屋,冇水又冇電。」十多歲在果欄謀生,就讓他體驗到人性的善惡,因此當演員後他最愛做黑社會,他說:「黑社會起碼有個宗旨,起碼同你講道義,我喺果欄大,啱啱入去做搬運三唔識七,唔係靠鋪蠻力就搵到錢,16、17歲推生果,嗰陣唔識規矩,咪成日俾人打,但你唔好睇呢啲粗人,人總係鍾意照顧弱者,佢打打吓又覺得你呢個𡃁仔又幾好,打唔還手,好啦!畀啲好嘢你撈,人就係咁捱出嚟。」

場地提供:Cubus 28 x 月下酌

娛聞樂陪你走遍全球追星,即Like「娛果」FB 專頁!
BannerBanner