何栢良建議政府搵萬人迷姜濤做疫苗代言 網民:搵溫拿啦

更新時間 (HKT): 2021.05.04 13:31

人氣爆燈的MIRROR成員姜濤早前被大台醜化成「薑蓉」,惹來一眾姜糖不滿,到姜濤上月30號22歲生日,全城姜糖豪擲逾50萬祝賀B-day,用行動證明邊個先係人氣王,直摑大台一巴掌!

估唔到姜B人氣急升,連港大感染及傳染病中心總監何栢良都feel到,今早在商業一台《在晴朗的一天出發》受訪時,指本港疫苗接種率低,建議政府用明星效應,搵姜濤呼籲市民積極接種疫苗,「睇到呢啲變種病毒越來越多,而家全球第二波,世界各地嗰啲變種病毒喺度傳播,所以我哋香港都再呼籲市民積極啲去接種疫苗,同埋政府都諗吓,嗰啲人氣高嘅歌手嗰啲,姜濤呀,政府可以呼籲呢啲人出嚟講兩句,又或者喺IG講兩句呼籲市民打疫苗」。姜濤一向形象正面,最近已取代周柏豪,他跟蔡卓妍拍攝預防HPV廣告。

而主持人郭志仁笑言是否要逼成隊MIRROR打晒先可以開演唱會,陳志雲則笑稱:「我噚日先有講完,應該演唱會要加凳,打咗針先可以攞到飛。」其實噚日《在晴朗的一天出發》都討論過上海虹口區邀請女子偶像團體SNH48擔任公益宣傳大使,到疫苗接種現場為fans蓋章,成為大陸網上熱話,咁樣可能有號召力。之不過近日MIRROR十二子努力為演唱會備戰,姜糖們看到已覺得心痛,相信MIRROR應該暫時未有時間去打針。

姜濤經理人黃慧君(花姐)今日出席活動時被問及此事,花姐指MIRROR忙於準備演唱會,沒留意新聞,亦未有相關人士就有關疫苗事宜斟洽姜濤合作。花姐透露,她與姜濤曾討論此議題,但姜濤父母年紀大,身體不算好,加上姜濤是公眾人物,工作要接觸不同人士,難免擔心,但一直只是商討階段,未有落實會否注射疫苗,待有更多疫苗數據才落實。

有網民笑言搵姜B做疫苗代言成效不大,姜糖好多都上咗年紀未必會去打針,另有網民稱可以考慮叫ERROR去「挑戰」,亦有網民提議「Big 4打」、「搵溫拿啦!X你個街,不要搞姜濤」、「點解唔搵千禧五虎」、「點解唔搵曹永廉同蘇永康」、「應該係女嘅搵楊千嬅、男嘅搵填海華」等。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner