求叔設靈丨黃樹棠胞妹黃文慧激動合十不捨 兒子玩父留下遊戲存檔感觸落淚

更新時間 (HKT): 2021.05.05 17:47

資深藝人黃樹棠(求叔)在上月10日因肺癌病逝,終年74歲,其任職配音員的兒子黃榮璋今在世界殯儀館為亡父設靈,求叔的遺體明日大殮後將會火化,並會遵從亡父生前意願,將骨灰撒在紀念公園回歸大地。

靈堂上橫匣寫上「永遠懷念」、堂前放了蘋果、橙、可樂等祭品,靈堂前放了兒子黃榮璋致送、寫上「親恩永懷」的心形花圈,而求叔胞妹黃文慧的花圈亦放在靈堂側邊。

從影近半世紀的求叔,曾効力不同電視台及機構,合作過的演員無數,當中成龍、古天樂、劉德華、羅蘭、吳思遠、呂頌賢麥景婷夫婦、森森、斑斑、姜皓文夫婦、陳煒、關菊英、關寶慧、冼灝英、陳榮峻吳香倫夫婦、黃樹棠影迷會、煒烈等。

黃文慧情緒激動

黃榮璋與姑姐黃文慧一同在靈堂外受訪,黃文慧開口不久便情緒激動,全程哭着受訪:「人間總有情,喺呢個咁惡劣嘅疫情裏面,阿棠哥一路好走咁樣,佢就會離苦得樂,佢留喺度戥我哋受苦,我哋仲痛苦,榮璋,記得爸爸係好錫你㗎,你知唔知呀?佢走咗就係錫你㗎喇,佢唔想你辛苦呀,你要乖呀……」黃榮璋見狀也回答:「知呀,知呀。」來安撫姑姐

問到求叔有否遺願,黃榮璋指:「其實佢都走得幾急嘅,但就唔係話好痛苦、好辛苦嘅,大家都可以放心,佢遺願……佢唯一同我講嘅可能係之後會綠色殮葬,去灑啲骨灰喺紀念公園,呢個係佢唯一交託我一定要做嘅事嚟嘅。」

提到昨晚為亡父收拾遺物,是否很感觸?黃榮璋坦言:「都有呀,其實都同佢住咗咁耐,我發覺原來佢鍾意嘅嘢其實唔係好多,佢平常着啲衫褲都好casual……」黃文慧聞言插嘴說:「佢個人唔奢侈㗎!」黃榮璋續說:「我執完佢要着嘅衫,我心諗,會唔會唔夠隆重?但佢就係鍾意嗰啲。」他指父親平日很少着隆重的衣飾,只有登台或工作所需時才會着,所以他也挑了亡父生前的西裝給父親。

黃文慧表示,因為他們有很多兄弟姊妹及姨甥等在外國,由於受疫情影響,無法親身來送別,她又感謝傳媒:「大家都有心,你哋都有心喇,多謝你哋,喺呢個疫情之下,畀我哋有啲溫暖,希望棠哥可以一路好走啦!」之後她更泣不成聲。黃榮璋補充向其他曾經出力的人致謝,包括演藝人協會、古天樂、武師公會、特技人協會等,都曾慰問及幫手,他表示感激。

打機憶亡父

黃榮璋講到喪禮不會有任何宗教儀式,因為父親臨終前有提過近年不喜歡嘈吵的環境,所以不想要宗教儀式,讓靈堂安靜,亦不希望來賓愁眉苦面,令大家的觀念好一點。黃文慧哽咽再指:「都係唔捨得㗎嘛,我哋同佢喺呢個影視圈入面出生入死咁多年,盡咗咁多能力,冇功都有啲勞力,我都希望佢靚靚仔仔,100年後又一條好漢重戰江湖。」

黃榮璋指求叔因為沒有特別喜好,所以不會有特別的陪葬品:「佢本身都冇乜貴重嘢,佢平時喺屋企最貴重嘅,可能係玩部遊戲機囉,哈哈!我諗佢唯一留低畀我嘅,就係嗰部遊戲機,可以打佢啲save囉,都係開心嘅回憶嚟,所以我打機都想喊。」

黃文慧再指:「我今日係唔應該喊嘅,我係應該送佢出去外景,因為我做藝員部做咗20年,我所有嘅藝員我都係陪住佢哋出去做嘢,接接送送,今次阿棠哥係唔會寂寞㗎,佢有一班人喺度check in緊,喺機場度等緊一齊出外景,所以我買咗好多食物,都係佢出外景食嘅,我個心意就係嚟到呢度,所以我係唔應該喊嘅。」

黃榮璋表示認同說:「我都會當佢係去旅行、去環遊世界啦!」黃文慧指相信亡兄會與已故的譚炳文、李香琴前一齊搭飛機到另外一個國度旅遊、登台、唱歌:「應該係好開心。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner