【娛樂人物】為追夢山窮水盡要借錢 
布偉傑做硬衰人 繼續演

更新時間 (HKT): 2021.05.05 02:00

無綫「御用鬼佬」布偉傑(阿一)2018年離巢後作多方面發展,希望在外面的世界有更多有發揮的演出機會。但為求繼續追尋演藝夢,阿一去年山窮水盡,一度被迫問朋友借錢度日。雖然如此,但阿一仍堅持留港做演員,不過他亦做出最壞打算:「嚟緊十年我哋外國人大部份角色都係要做衰人,因為上面話我哋係衰㗎啦!」

布偉傑離開無綫後,現主力拍電影、炮製YouTube頻道,近日還自資開設遊戲教室,但疫情加上社會運動,迫使阿一走向山窮水盡地步。阿一日前在其位於荔枝角的遊戲教室接受《蘋果》訪問時說:「冇錢到用晒saving,要搵朋友幫手先交到租、有嘢食,上年係去到呢個地步,好彩最近有返啲電影同廣告。」

放棄百萬年薪

阿一曾在I.T.公司擔任銷售工程師,但因覺「唔好玩」而毅然放棄百萬年薪,全身投入演藝行業,由臨時演員做起:「嚟到香港喺電視見到河國榮,心諗『佢得我都有機會呀』!但臨時演員搵唔到錢,我做過part-time保安。」他從不覺得自降身價。

2006年阿一憑無綫處境劇《同事三分親》飾演「韋一」成功入屋,可惜始終因外國人角色受局限,最多扮演神父、警察、上司等,最終決定離巢,希望進軍大銀幕。但近年香港經歷巨變,他亦已作最壞打算:「最近同河國榮傾偈,佢都話嚟緊十年我哋外國人,大部份角色都係要做衰人,因為上面話我哋係衰㗎啦!」

拒搭上女藝人

阿一是美國人,擁有中國文學及亞洲研究雙學士學位,前任及現任妻子都是香港人,他在90年代做過埠新郎移居香港,由3,000呎獨立屋屈就住幾百呎蝸居:「94年尾做幼稚園教師,同前妻住喺佢家姐屋企,我一家三口一間房,佢哋兩公婆同三個仔女,加埋我哋一齊住幾百呎,香港就係咁。我好鍾意Mr.首歌《人一世物一世》,『地方細,住得貴,看物價鞭打打工仔』。」他指當初前妻反對他入行:「佢驚俾靚女搶走我啦,但其實我哋2003、2004年分開咗先,我先再有動力轉呢行。」他直認自己以前「好曳」,但從未與女藝人發生關係:「冇!冇!難聽啲講,驚人話喺度食喺度屙嗰啲!特別係嗰度地方做嘢好複雜,個個戴面具返工,你唔知邊個真正朋友。」

撰文:嵐山

攝影:仇志德

場地提供:一哥教室

娛聞樂陪你走遍全球追星,即Like「娛果」FB 專頁!
BannerBanner