鏡粉買兩張MIRROR黃牛飛出事 賣家「離奇寄失」疑有人冒簽

更新時間 (HKT): 2021.05.05 16:05

MIRROR演唱會將於明日(6號)開鑼,除咗門票一票難求,MIRROR嘅YouTube頻道亦超過10萬訂閱,可見MIRROR人氣爆燈!十二子近日落力綵排,苦練到凌晨,姜濤、Anson Lo及Edan更捱到病埋,搞到鏡粉非常心痛,批評演唱會籌備時間短,而且MIRROR十二子本來就多Job,根本冇時間休息,嚟緊仲要連踩6場騷,fans眼見他們付出,亦準備應援物以示支持,同時心急嘅鏡粉仍在網上撲飛,又擔心被黃牛黨捉心理,隨時墮入陷阱。

今日有一位鏡粉在網上透露自己早前買咗黃牛飛,雖然知自己唔啱,不過佢實在太喜歡姜濤及MIRROR,所以佢嘅另一半在開售首日已在代購平台買飛,炒價都唔平!該名鏡粉寫道「在viaxxxx平台買了category 1的前排飛請我睇」,而該網站上星期五開始陸續寄出門票,向該名鏡粉提供香港郵政掛號郵件編號,但事主發現該郵件在昨日上午11點幾已被簽收,郵件更離奇寄至黃埔花園一個單位,而並非佢所填寫嘅地址,但是「收信人的確是我先生的名字」。

該名鏡粉對於黃牛飛「離奇寄失」感到愕然,嘗試搵郵政人員幫忙,「三個職員試圖取回2張Mirror演唱會飛的掛號件,但收件那位竟冒認佢本人就是我先生」,唔肯交回郵件,事主束手無策,只好報警處理,希望對方良心發現,速交回郵局「自首」。

不少鏡粉雖然罵事主不應該買黃牛飛,但係佢哋普遍認為有機會係騙局,「賣家寄回畀自己」扮寄出,叫事主當畀錢買教訓,鏡粉紛紛討論買黃牛本來就存在危機,「賣家寄空信封或者寄畀自己,你都吹佢唔脹,因為唔係正途買飛,永遠得不到保證」、「如果係黃牛飛,人哋賣家有哂信用卡證明張飛係自己喎,黃牛黨可以報失調番轉話你偷都得」、「如果條友有心詐騙 ,你係冇辦法拎到」、「支持你報警!一定要將呢啲害群之馬繩之於法」、「幾時都係一手交錢一手交貨最安全」等,叫事主打定輸數。

事後該名事主亦有回應此事:「我係好早買,所以冇咁癲價,估計係賣家發覺原來可放更高價所以出此下策。」事主指可能賣家想用高價再轉售畀另一個人,所以才扮寄出搞一場大龍鳳,事主今午回覆指賣家已透過中介平台發出通知,聲稱「冇飛畀,會全數賠」。事主相信係賣家怕件事鬧大,因為噚日已有三個郵政人員上門取件不果,幸好事主冇金錢損失。

此外,有另一位鏡粉雖然冇畀人呃,不過佢自訂淘寶發光手環時卻爆出笑料,該名鏡粉等咗一段時間,噚日收到貨,滿心歡喜開箱卻發現貨不對辦,佢無奈開post:「是我做錯,是我做錯,還求甚麼,等我仲期待咗幾日。」事緣該名fans訂購發光手環,事前為免出錯,佢先跟賣家對話,更講出一句「Sorry咁寫 Mirror Keung Man」,賣家似乎睇唔明港式口語,直接把「咁」同「Sorry」印埋落手環上面,惹來一班鏡粉笑爆肚,指該名網民係「勇者」,另有網民留言:「大陸人係睇唔明sorry咁寫係點解。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner