林德信自資6位數字出新歌 邀爸爸林子祥客串MV

更新時間 (HKT): 2021.05.06 19:14

林德信近日推出新歌《愛沒有理由》,日前MV亦已在YouTube上架,他昨日在銅鑼灣接受訪問,透露3年前與恭碩良創作這首歌,他笑說:「今次寫呢首歌,對我嚟講係好大挑戰,因為不斷改,而且音域好闊,我都驚自己唱唔到,所以花咗3個月時間去練,最後錄咗一年。」他指這首歌的故事性強,所以構思MV時,不能再像以前一樣求其用手機拍攝,「故事牽涉太空、宇宙、時間嘅時差,所以拍咗一年。」

林德信表示今次用了CG特效,做歌成本相對提高,所以他自資了6位數字:「我咁諗,呢首歌擺咗喺YouTube之後,應該係永久,所以我覺得係值得。」

新歌MV找來爸爸林子祥客串演出,林德信笑言要食4餐飯才敢開口邀請他:「如果要呈現宇宙嘅時間,角色就要變老,咁要用CG,咁都係錢吖,所以導演提議搵個演員做,雖然別無他選(搵爸爸演),但我當時唔想,擔心啲人話我靠人事,不過我真係搵唔到一個演員係我滿意。」林德信開心表示爸爸肯答應演出最後一個鏡頭,而他亦都有給爸爸一封利是作為酬勞。

至於林子祥亦有拍片幫兒子宣傳新歌,他指兒子的新歌MV花了很多心機和本錢去拍攝:「我已經睇過,因為佢畀咗一個茄喱啡角色我做,不過最尾先有一個鏡頭,如果仲有啲咩好嘅茄喱啡角色,記得搵老竇!」林德信聞言後笑說:「對我嚟講,佢嘅客串好重要,佢幫我交代到時差;佢講過一句好有緣,佢話我由細到大聽到佢唱『願我會揸火箭,帶你到天空去』,可能我已經洗腦我自己都唔知,睇返歌詞係呢個MV嘅故仔,好有緣!」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner