喱騷終章|黃秋生返香港係等死 杜汶澤︰去到邊記住自己係香港人

更新時間 (HKT): 2021.05.06 17:19

杜汶澤在台灣超過半年,他主要在當地為自家網上電視台喱騷開工,拍攝《尋找他媽的故事》。早前找來已移居當地多年、一代「文青女神」蔣雅文(Mandy)出鏡。來到最後一集,嘉賓是重量級人物黃秋生,秋生在對談中寄語香港年輕人,與其長嗟短嘆,不如想想往後去向。

秋生多了同老婆相處

節目一開始阿澤炮製了一煲煲仔飯招呼秋生,一解鄉愁。飲飽食醉二人的對話開始天南地北,講到在台灣的生活同香港比較,他們認同台灣節奏較慢,台灣人較有耐性,不似香港人急躁。阿澤問到秋生在港、台兩地,會揀哪裏居住時,秋生毫不考慮話︰「而家就梗係台灣啦,香港點生活呀。我返去係等死,第一係冇嘢做。呢個係我人生理論同哲學︰幾十歲、冇工作、冇人等你,淨返只可以坐喺屋企,日出就等日落,日落就等日出,你等得幾多年,你冇目標、冇目的,冇目標嘅人三兩年就瓜柴,咪等死囉。」秋生表示就算現在回香港教人演戲,都沒有學生敢上堂,因為學完之後就會被標籤而失去工作機會。

一向鮮有提到家庭的秋生,今次提到同太太吳惠貞的相處,他說︰「唯一一樣冇做,而家做多咗嘅係返到屋企,同老婆傾吓偈,呢個係多咗。嚟之前成日喺屋企煮飯佢食、傾吓偈,一齊時間多咗。雖然係屋企嘅時候,都係佢返入房我喺廳度,以前係好少有咁長時間相聚。要珍惜嘅,尤其係阿媽走咗之後,每日都會諗起阿媽,有好多好後悔嘅嘢,發現人同人之間嘅關係,真係要珍惜。長時間以嚟冇珍惜過同我老婆嘅時間。」講到兩名兒子,秋生表示全部不在香港「所以咁安樂」。

阿澤籲珍惜當下

對於香港年輕人,秋生都有忠告︰「我哋呢啲幾十歲,你話冇感覺呀?幾十歲人喺同一笪地方,朋友喺嗰度、事業喺嗰度,喺嗰度長大,所有回憶喺嗰度。幾十歲,你突然掃咗張枱叫我行去第二度,好似放逐咁,你話我冇感覺咩?就冇可能。但係我覺得,如果一個廿歲嘅人,佢嘅生命啱啱開始,不如搵你嘅精力去諗下,點樣去生存。好似以前游水落嚟嘅人,一日做三份工去生存,已經係逼住嚟,冇得困擾。」秋生話要抉擇無疑痛苦,但香港人作為種子,漂洋過海未嘗不是一個選擇,在旁的阿澤表示「香港冇根」。

杜汶澤今日接受《蘋果》訪問,他以短訊回覆表示不用太悲觀︰「唔需要憂懷喪志嘅,香港人去到邊度,無論乜嘢地方,都要永遠記住自己係香港人,堅強繼續生存落去,冇問題嘅。過咗去就唔需要諗咁多,將來嘅冇人會知,珍惜當下啦。冇乜嘢好心悒,哀兵必敗,自強不息啦。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner