MIRROR演唱會丨姜濤彈古箏跳熱舞跪地 上吊台飛越Star Hall驚驚

更新時間 (HKT): 2021.05.07 00:03

MIRROR上月初入梅窩錄新一輯團綜,今次演唱會中途播出拍攝時的花絮片段,眾人素顏以真面目示人。花絮片段包括AK與姜濤喊,眾人互擁安慰;集體在海邊紮馬練拳等畫面。

之後MIRROR再次整隊上台,一連串獻唱其他歌手歌曲,唱到《給自己的信》時,台上有種校園feel,成員間擊掌又背貼背坐,Lokman說:「2年半時間話長唔長,話短唔短,一直以來有正面有消極,由最初似牛咁衝去到可以獨當一面,有自己想法產生矛盾,生命就係要令到繼續有火花先可以繼續落去。」

然後MIRROR到升降吊台,Lokman即笑說:「你睇可以姜濤有幾驚?男人老狗畏高,你哋都抵喇,睇到我哋褲浪。」一邊吊出觀眾席並唱出《我們都是這樣長大的》,後排觀眾得到機會近距離與MIRROR打招呼。唱出《一秒間》時,他們在吊台上打拍子,姜濤全程不太雀躍,驚青地嗌「唔好亂郁!」未如其他人enjoy。

姜濤由吊台回到舞台後,solo表現終於變得生猛,出場時先彈了幾下古箏,到唱《精舞門》時跳得起勁,與之前相比判若兩人,最尾唱個人歌《master class》更型到跪地,獲得歌迷尖叫。

Alton獲安排以talk show壓軸,他先問入場鏡粉是否入場捧姜濤、Ian場,成功獲得大量歡呼支持,他又自嘲說:「唔明花姐點解搵我做壓軸,即係壓力,想我做姜濤接班人?唔得啦,唔通花姐想我死?唔會嘅佢好錫我哋,可能排rundown時唔記得咗我。」他又指有次返家吃飯時正播放《Reflection》,媽媽竟問「係咪退出咗?」Alton說:「唔使驚,我同Frankie都有2.9秒。」

Alton講到以前有次與同學見到郭富城演唱會海報,希望自己畢業後可以開演唱會,好友竟說:「你憑咩呀?你真係開演唱會我食咗張海報去。」Alton即場叫好友食海報,還指好友好彩,因為他未踏紅館,不然張海報更大張。然後再翻摷3年前首次開騷時,MIRROR被網民睇死,曾有人在討論區寫上「憑咩呀?3年後仲喺度先講。」Alton說:「3年後我唔知,但係兩年半後,我哋仍然喺度,我哋憑乜嘢?就係憑你哋嘅愛護同支持,好多謝。」

Encore時隊長Lokman再率組員感觸發言:「我哋12人上到呢個台唔容易亦唔係隨便嘅事,有你哋就更唔容易,一路以來經歷太多,最後要捉緊信念,只要你肯相信到最後一定得,只係一個念字,大家要互相捉緊!」唱出最後一首歌曲《One and All》,在歡呼聲下結束。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner