add名人時尚|張新悅10年生四個 女兒又嘈又窩心 寄語天下母親「要瞓足覺」

更新時間 (HKT): 2021.05.07 06:00

周日就到母親節,45歲的張新悅(Nicola)家有四條Queens,多產媽咪一個湊四個女兒,同時做三份NGO工作、開網店、做KOL,非常多功能。張新悅早前和細女Lola一齊親子活動包湯丸,笑言忙到希望每天能有30小時,「呢十年我多咗嘅嘢,就係多咗白頭髮。」直言湊女再辛苦都值得,但寄語天下母親也要愛錫自己,「瞓足覺先可以處理問題。」

和張新悅做訪問,會發覺她語速非常快,沒法子,因為同時要應對四個不同年齡層的女兒:12歲大女Lucy 、10歲二女Lily、6歲三女Leah及2歲半的細女Lola。大女已去到青春期,要教育金錢管理概念,而細女則仍屬嬰幼兒時期,「媽咪呢個身份?一個字:倦。我係一個獨生女,從冇諗過原來生小朋友係咁嘈嘅,生第一個,無嘢喎;第二個,咦,點解屋企有聲嘅,後來,係好嘈又好倦,個天畀咗四個(女)我,咁原來四個有一件好嘅事發生,就係佢哋自己互相嘈大家,係一個小天地咁。」

她早前帶住兩歲多的細女Lola,兩母女一齊包湯丸預祝母親節,Lola不怕陌生亦不怕鏡頭,小女生充滿自信。Lola出生第二年就遇上疫情,張新悅直言對女兒成長影響不多,皆因家中人多,在家也十分熱鬧,「零至兩歲,爸爸媽媽嘅陪伴係最重要,屋企長期有六七個人響度,對佢係無分別。其實無所謂,今日有疫情,明日亦會有其他嘢,每個時代都有不同嘅問題,只要響當下畀最好嘅佢就得。」

計劃許多時趕不上變化,正如張新悅在2007年與區議員楊哲安結婚後,原定計劃生兩個小朋友,十年間變成四個 ,她笑言已經適應了這種混亂又甜蜜嘈吵的大家庭生活,「我已經唔記得咗生第一個嗰種感覺,但當三個女出咗街時,我又覺得好似無嘢做咁,啲人話湊一個細路好辛苦,我就會講笑,話咁你生第二個啦。」她堅持不能只做媽咪角色,同步打理自己的網站小生意、me time扮靚去活動及任職三間非謀利機構,最近她為香港有機資源中心出任大使,和男子組合FreshLife合作唱主題曲《簡簡單單原來很快樂》,早前錄歌拍MV ,供未來有機市集推廣用。「留響屋企做一個24小時嘅媽咪係好辛苦嘅,做嘢工作反而係我嘅娛樂。每一刻我都好享受,年紀又唔細喇,就好想做返啲對社會有貢獻嘅嘢,就係:環保。」

主張環保及愛大自然,張新悅婚後繼續讀書,2012年修畢環境管理學碩士,家中嚴禁浪費,女兒小時候一缸水要三個輪流沖涼,廁紙亂用要罰配給,閒時一家六口去行山、去海灘執垃圾。她一直覺得身教仔女,教授人生價值觀、品格,學懂自我挑戰,比教授學業更重要。「雖然我係好多小朋友嘅媽咪,但我唔敢去教人,我又唔係特別叻,每天都有好多新嘅煩惱。有四個小朋友之後,我發覺有啲小朋友係天生大愛啲嘅,有啲係天生自私啲、自我啲嘅,作為媽咪,我點樣令到佢哋明白世上有其他人,要去尊重別人、尊敬長輩,有冇去關懷別人,有冇同理心等,係更緊要囉。」

香港大部份媽咪都一樣,時間分配極具挑戰,如何安排一家六口作息?張新悅的時間表由朝早八點起身,上午出外開會工作,午餐、下午茶及晚餐時間堅持盡量留家中親子交流、教育,每晚亦會預留一小時兩夫妻傾心事,時間規劃細到以15分鐘一個單位。她從NGO探訪中,得出經驗是媽媽也要對自己好,「要瞓足覺!我相信大部份媽咪都唔覺,就係忽略咗自己嘅睡眠,作為媽咪,你有時需要好大嘅容忍力,但你個人一倦,係做唔到嘅,當你自己照顧唔到自己,就照顧唔到小朋友。」

每年母親節是她一年一次放假、不用編排女兒日程、不用安排一日三餐,「每年嘅指定動作,係佢哋會煮一個好豐富、好美麗嘅早餐畀我食。每一次都係我二女做,生女就呢樣好,佢哋對慶祝、過節好上心,好窩心。有一年情人節,在露台整咗個燭光晚餐,仲自己拉小提琴,我覺得自己真係好幸福。」至於最想收的母親節禮物?「我唔夠時間用,如果呢個世界一日有30小時就好喇,願望呢,我同啲女講,希望母親節嗰一日,你哋無人問我問題,有事自己去解決,咁我就安樂喇。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner