MIRROR演唱會丨花姐嚴格頭場只畀60分 綵排表現仲好有大量進步空間

更新時間 (HKT): 2021.05.07 01:13

MIRROR昨晚在九展舉行首場演唱會,12子落力演出接近3小時,其間又唱又跳剝衫騷肌,有熱血有激情有汗水。散場後,大批姜濤和Jeremy歌迷熱情未減退,紛紛聚集在地面大堂自己狂歡影合照,玩完一輪後陸續離開。

至於MIRROR經理人花姐在完騷後接受訪問,坦言對於今晚12子表現只會畀60分。「其實噚日full dress表現仲好過今日,佢哋明顯今日比較攰,今晚只能夠畀60分,但係自己做過咁多次full dress rehearsal,從未見過有藝人會咁落力去綵排,畀60分係希望佢哋之後可以再做好啲,希望尾場可以做到90分。」

對於首場Rundown的安排,花姐指已盡量安排眾人有分開獨立自己一part的表演,希望做到他們有時間休息之餘,亦都可以給他們表演自己的長處。「所以Alton擅長講嘢,我哋咪畀佢有一part講嘢囉!」對於Anson Lo和Edan帶病開騷,花姐亦坦言怕他們在這幾天身體難以應付。「早幾日已經帶佢哋睇醫生,醫生話佢哋聲帶腫晒,唔可以太過大聲講嘢,惟有不停食藥同飲水消腫,覺得Anson Lo畀自己太大壓力,見佢真係好落力。」

花姐嚴格,不過鏡粉們就好受落,Frankie的小fans JoJo讚非常有驚喜:「成個騷好好睇,我最鍾意Frankie,佢今晚表演好驚喜,完全冇失望,所有佢嘅表演都好睇,我畀佢今晚滿分。」另一位「爵屎」YoYo亦讚perfect:「最鍾意encore嗰part,因為有我最鍾意嗰首《reflection》,最鍾意Edan,佢今晚表演perfect,今晚唱咗好多歌,已經好好,都做晒我想睇嘅。」男fans Zac亦讚encore出色:「好驚喜呀,尤其係最尾快歌同encore位,最鍾意嘅《IGNITED》,原本以為佢哋唔唱㗎,所以好開心,睇晒想睇嘅嘢。冇話再特別要佢哋表演啲乜嘢,唱咗好多歌都夠。」

陳卓賢fans Koey最鍾意合唱《蝸牛》:「好鍾意佢哋五個人一齊唱《蝸牛》嗰part,超感動。最有驚喜係吊台環節,買咗$780座位,可以近距離見到,超開心。」她亦希望Ian可以跳更多舞:「見佢努力扭咗幾吓,可以再有突破,但已經進步好多。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner