陳凱琳媽媽親揭龍鳳胎混血之謎 稱14、15歲突然變樣

更新時間 (HKT): 2021.05.08 14:37

陳凱琳(Grace)的媽媽陳劉惠嫻(Connie)日前為車淑梅的港台節目《舊日的足跡》擔任嘉賓,暢談子女的有趣童年,並剖白對女婿鄭嘉穎的觀感。Connie今年將迎接一個更熱鬧的母親節(5月9日),因她多了一個新抱,也多添了一名孫兒;她透露子女會親自下廚,又一家人外出用膳,笑言已任由他們擺佈,總之要健康開心,日日都是母親節!

陳母:加拿大食物多荷爾蒙

曾有人將香港小姐冠軍女兒Grace與龍鳳胎弟弟Derek的混血兒標致外貌與大女兒Joyce作比較,坊間亦流傳大女兒曾因為妹妹生得較漂亮而感到自卑,Connie自揭真相:「其實Grace同Derek龍鳳胎出世嗰陣,同大家姐一樣非常白淨,但突然喺14、15歲嘅時候,眼大咗、臉尖咗,阿仔鬚根多咗,可能我媽媽係馬來西亞人,擁有亞裔嘅容貌,細路又喜歡戶外活動,又或者加拿大嘅食物有好多荷爾蒙啦!」

Connie表示大家姐Joyce比較運動型、率性、唔計較,是很柔和的人;相反Grace 3、4 歲開始已經好貪靚,不穿裙子寧願不出街,她續說:「有一次去海洋公園,佢硬要着裙,否則佢寧願唔去,結果佢真係選擇留喺屋企。坦白講,Joyce 14、15歲進入青春期,我真係問過佢:『如果有人話妹妹靚過你,你會唔會唔舒服?』Joyce直答唔會:『佢(Grace)係我妹妹,每個人都靚,只係角度唔同,其他人唔可以用容貌去分裂我哋,否則我會將話題停止。』」

Connie續說:「Grace好愛家庭,好愛家姐、崇拜家姐;而Joyce就好有創意,屋企嘅聚會都係由佢安排,令到所有人都好開心。就最近嘅傳聞,可能因為嗰啲人冇跟我哋相處過,就將自己嘅直覺同觀點寫低,咁係好自然嘅事,但如果真正進入我哋嘅家庭,甚至親戚朋友都會感覺到絕對冇咁嘅問題存在,我哋唔需要力證啲咩,最重要內心嗰份真愛同平靜,Joyce 5月生日,妹妹已經為佢焗咗個生日蛋糕!」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner