當媽媽後深知母愛偉大 
張美妮享受湊女:追多個細佬妹畀佢

更新時間 (HKT): 2021.05.08 02:00

張美妮2013年嫁予髮型屋老闆黃偉強(KK Wong),前年6月誕下女兒黃洛雯(Kelly),今年母親節,張美妮將與愛女一同度過。美妮囡囡乳名「笑咪咪」,日前她們穿上靚靚母女裝到公園玩耍,不時笑咪咪的Kelly人見人愛,張美妮說:「今年係我第二個母親節,都係簡單同屋企人食飯。今年唔同啲,因為佢大個咗啲,返咗playgroup,我未到母親節,已經收好多母親節禮物,老公同佢上堂嘅時候,佢哋用紙、膠片做咗紮花送畀我,我覺得好sweet、好感動。最得意嘅係佢返嚟會記得,係送禮物畀媽咪,我感受好大。」

做好榜樣

當上媽媽後深知母愛偉大,美妮指願意為女兒付出一切:「我發覺媽媽呢個角色,係我最想做嘅,我可以完全付出耐性、心力,我呢世人未試過咁出力做一樣嘢,我好enjoy。以前覺得最鍾意係工作,但𠵱家發覺工作唔及得上照顧佢,我雖然由朝到晚都只係湊佢,但係好開心。」

張美妮1999年參加無綫電視藝員訓練班入行,結婚後減少了幕前工作,她表示:「之後偏向咗做生意,但做咗媽媽就唔同,全副心力都放喺阿B度。」不過她指未放棄演藝事業:「我覺得有咗阿女之後,目標理想同期望大咗,反而覺得一係唔做,如果有表演,我會做得更加落力、有耐性同毅力,呢個鍛煉畀阿女見到,將來就係佢嘅榜樣。」

收斂脾氣

美妮笑言囡囡在她身上學了不少陋習,自己時刻謹記要懂得收斂:「從佢身上見到好多我嘅影子,我脾氣唔係咁好,𠵱家個女喺度,我點都要忍住,唔好俾個女見到。以前從來冇諗過會改到,𠵱家好大推動力,叫自己一定要做到。我期望佢健康、快樂開心,做一個善良有同理心嘅人。」美妮希望努力生多一個細佬妹,陪伴Kelly成長:「因為自己都係兩姊妹,係好重要嘅一個人,亦係自己最好嘅朋友,大個有親人溝通,希望追多個細佬妹畀佢。」

娛聞樂陪你走遍全球追星,即Like「娛果」FB 專頁!
BannerBanner