張美妮發揮毅力重拾狀態 Enjoy湊女擺脫宅媽框框

更新時間 (HKT): 2021.05.08 06:00

張美妮2013年嫁予髮型屋老闆黃偉強(KK Wong),前年6月囡囡黃洛雯(Kelly)出世,乳名「笑咪咪」。今年母親節,美妮與愛女一同度過。

預收母親節禮物

日前她們穿上靚靚母女裝到公園玩耍,不時笑咪咪的Kelly人見人愛,現時主力照顧家庭的美妮,有女萬事足,「今年係我第二個母親節,都係簡單同屋企人食飯。今年唔同啲,因為佢大個咗啲,佢返咗playgroup,未到母親節已經收好多母親節禮物,我老公同佢上堂嘅時候,兩父女用紙、膠片做咗紮花送畀我,我覺得好sweet、好感動,最得意嘅係佢返嚟會記得,係送畀媽咪嘅禮物,感受好大。」當上媽媽後深知母愛偉大,美妮願意為女兒付出一切,「我發覺做媽媽嘅角色係我最想做嘅,我完全可以付出耐性、心力,呢世人未試過咁出力做一樣嘢,我好enjoy,以前覺得最鍾意係工作,但而家發覺工作係唔及照顧佢。雖然由朝到晚都係湊佢,但係好開心。」

在娛樂圈工作20年,現時美妮已踏進人生的另一階段,結婚生小孩,人生美滿,「離開幕前工作後都偏向咗做生意,而家做咗媽媽就唔同,全副心力都放喺阿B度,但係我覺得生活都需要平衡,呢排就做個網上媽媽節目。」

身份變了,美妮再次拾起以往的工作,心境都不一樣,她說:「起初都唔慣,雖然只係3個鐘,但係都會好掛住個女,又會覺得好內疚,覺得冇陪住佢,但係慢慢適應返工作狀態,會覺得媽媽係佢嘅榜樣,我覺得佢會知道媽媽都好努力工作、努力keep fit,反而有個動力,令我覺得我都要生活平衡,同時都要工作,等佢見到一個努力嘅媽媽,唔只係一個只會喺屋企、『咧啡』嘅媽媽。我覺得有咗阿女之後,目標理想同期望大咗,反而覺得一係唔做,如果有表演,我會做得更加落力、有耐性同毅力,呢個鍛煉畀阿女見到,將來就係佢嘅鍛煉。」

改陋習免成壞榜樣

美妮又笑言囡囡從自己身上,學了不少陋習,教曉自己要收斂,「佢真係不斷copy,從佢身上見到好多我嘅影子,例如我脾氣唔係咁好,當然我老公受晒,而家個女喺度,我老公就開心,好少受我脾氣,因為我點都要忍住唔好畀佢見到,以前從來冇諗過會改到,而家好大推動力、叫自己一定要做到。我對佢嘅期望係健康、快樂開心,做一個善良有同理心嘅人,踏出社會做事,要同人相處,有同理心同人相處好啲,自己亦開心。」

美妮又希望努力追多一個陪伴Kelly成長,「因為自己都係兩姊妹,係好重要嘅一個人,亦係自己最好嘅朋友,我覺得到大個有親人溝通,希望追多個細佬妹畀佢。」

現年41歲的美妮誕女後早已回復苗條身材,她不時性感跳舞,穿上低胸裝拍片放上社交網,老公不但沒有呷醋,還舉高手指公讚好!美妮說:「未去返之前體重嘅,而家仲努力緊。而家有玩吓跳舞,主要滿足自己,𠱁吓自己開心,分享出去有人鍾意睇,老公又唔介意,可能佢見慣我生完B『咧咧啡啡』個樣。我拍完片都會傳畀佢睇,佢會畀個good我,可能佢都想見返平時靚靚嘅我,真係需要生活平衡。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner