MIRROR演唱會丨Anson Lo「教母」登場!《膠戰》Jeffery被集郵塞爆通道

更新時間 (HKT): 2021.05.09 22:30

人氣組合MIRROR今晚在九展舉行第四場演唱會,ViuTV節目《膠戰》主持黃正宜、岑珈其、魏浚笙(Jeffery)、徐浩昌(肥腸)及劉沛蘅(Hillary)到場,引起一陣騷動,被大批MIRROR fans包圍住,他們舉步維艱,最後要由MIRROR經理人寶姐即時帶領入場。另外,今晚亦見到晚風水師七仙羽、造星同學應智越(細貓)都有到場欣賞演唱會。

適逢今日是母親節,「教主」Anson Lo開騷前在IG貼相,原來父母今晚入場做VIP睇騷,「教父教母」又與MIRROR合照,Anson Lo說:「其實每一次上台都會諗起你地由細到大教過我,『一係就唔做,一做就盡力做』希望你哋會為我感到驕傲。」Edan戲稱他們一家是「教庭降臨」,結果被fans催斟新抱茶。

場外也有不少媽媽級fans攜同子女到場,梁先生一家四口及子女的契媽成功搶購幾袋紀念品,包括T恤、頭箍、口罩、扇仔等,梁太喜歡Ian(陳卓賢)、Anson Lo(盧瀚霆)和姜濤,還指老公最先喜歡看《全民造星》,梁先生不諱言十分欣賞姜濤、Ian和ERROR隊長肥仔:「我鍾意佢哋份堅持,香港人喺呢個時候好難有㗎喇,堅持去改變自己,呢份精神係好值得去學習,希望小朋友都好似佢哋咁,佢哋(MIRROR)雖然有缺點,但佢哋會去克服,肯面對,性格方面,都係好值得學習。」提到今日是母親節,梁生表示可惜撲不到演唱會門票:「買唔到飛,所以攞咗啲錢嚟買紀念品,大約用咗2,000幾蚊,買張飛都唔止啦,而且可以當係母親節禮物。」

至於Ian fans何小姐和張小姐,今晚第一次睇演唱會:「之前冇上網睇片,我怕冇咗神秘感。」談及未能陪媽媽過母親節,何小姐說:「今朝同媽咪食咗飯,而且媽咪都鍾意Ian。」張小姐則說:「其實我都唔開心,但媽咪都鍾意Ian,我哋就影多啲相送畀媽咪。」現場放滿各成員的應援物供fans影相,何小姐和張小姐表示:「當知道MIRROR開演唱會,我哋就開始準備,所有錢都係大家夾錢,大約超過5位數字。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner