母親節丨林利靠親情助癌疾母脫危 侍母至孝︰願陪佢一世

更新時間 (HKT): 2021.05.09 00:00

5月9日是母親節,又是子女一年一度盡孝日子,對於林利兩兄弟沒有特別,因為日日都是母親節。

現年54歲、前小虎隊成員林利日前在美孚新邨接受訪問,他表示17歲出道之前,就一直在這裏生活,邨內有不少跟家人、特別是跟83歲母親的點滴。林利表示家人沒有慶祝母親節的習慣,他說︰「其實對媽咪好,日日都可以係母親節。」講到林媽媽去年11月確診淋巴癌,到現在半年間,情況由病重到而家好轉,可以落床行街食飯。其實在得知母親病重一刻,林利同弟弟已下定決心扛起照顧母親的責任,剛在台灣新婚的林利即時飛返香港︰「當時冇諗到最壞打算,完全冇咁諗。因為我有過癌症,以前對抗癌症,都係用輕鬆心態去諗,即係唔去諗佢,唔當有病,嗰時醫生都有問我,要唔要電療、化療,咁樣穩陣好多。我都冇,割咗之後就算。」他斬釘截鐵說,就算不幸母親要一世瞓床,都會「一世陪佢」。

母子情盡在不言中

林利形容同媽咪的關係是「在心中」,自言同媽咪一樣「cool」,不愛宣之於口,但都是關心對方。訪問期間,睡醒午覺的林媽媽兩次打電話來「搵仔」,只見林利陰聲細氣話「好快返」,臨上樓前更買了麵包做午點。林媽媽年輕時是才女一名,同已故的林爸爸,都是內地大學電機工程系畢業,且性格硬淨爽快,凡事不想麻煩別人,甚麼事都喜歡「自己搞掂」。林利話這方面同母親最似,好似當年自己患腸癌要開刀,都是前一晚才通知媽媽︰「唔想佢擔心、多嘢講,等佢嚟唔切擔心,因為擔心得嚟我都開完刀。」

母子間的互動,林利會以內斂來形容,作為傳統男孩,要講「我愛你」難度登天,林利笑笑口話︰「我哋其實都擺喺心度嘅,係睇到佢愛我,我愛佢。細細個都係咁,其實大家都幾cool。男仔唔會話『我愛你』,唔會成日講,今次講多咗,特別喺醫院嗰段日子。以前寫多,今次係講。」自小母親負責照顧兩兄弟,她採放任政策讓二人去闖。好似林利15歲入行,亦沒有管太多,及後林利到台灣發展,當時林媽媽的反應只是「去啦」,他說︰「但我相信心入面佢係錫我嘅,媽咪從來冇要求過我哋兩兄弟要點樣,亦從來冇問我哋攞過一毫子。就算你畀一毫子佢,佢就幫你儲夠三毫子。」

林利在外地漂泊多年,10年前若有所悟,決定回港,他說︰「好多身邊同齡朋友,雙親無聲無息走咗。我諗返自己嗰20年,20至40幾歲其實係好自私嘅,我哋只係掛住自己嘅前途去諗。你知啦,娛樂圈我每日要不停做好多嘢去keep住個所謂嘅知名度,其實係忽略咗家人,疏忽咗屋企。老竇早走,令我覺得唔好到失去先諗起珍惜,親情要自己把握。」坐言起行便經常港、台兩邊走,多了時間返香港同媽咪住。他笑言好多時媽咪在廳睇電視,自己在房上網,但他形容「屋企多咗一個人,就係一個人,人氣都唔同」。雖然母親怕耽誤自己,經常叫他返台灣,但內心深處林利感受到母親的喜悅,笑笑口話︰「個個阿媽都係咁」。

新婚回港照顧病母

講到當初得悉母親患癌,二話不說從台灣返港,除了準備同弟弟分擔照顧的責任外,更重要的是他相信「親情」的威力︰「媽咪83歲年紀大,只係同佢做過電療,化療唔敢做。佢嘅病可以話奇蹟轉好,除咗醫護盡心照顧之外,我諗最重要都係親情。」他回港第一件事,不是買輪椅、枴杖和先請工人照顧媽咪,他說︰「你咁做反而會嚇親病人,病嘅時候最需要都係家人,特別年紀大。自己都有過癌症,過來人心情,知道聆聽同埋親人喺身邊,對病人好重要,等佢知道唔係一個人。」用意是等病人有安全感,放鬆心情去對抗病源。他說從無「打定輸數」的想法,亦不信「久病床前無孝子」這句話,林利斬釘截鐵話︰「我唔會,假如媽咪一世係咁,同細佬都會一世陪佢。」新婚太太陳貞均早前對此有微言,林利話女孩子有投訴是正常,他對太太陳貞均已經是日哄夜哄,相信她亦看到自己的努力。

當初返港見到母親躺在醫院,插喉無力下床的境況難免心痛。當下他做了一個決定,就是要接母親回家,首先他跟醫護學習為母親抽痰,學成後接了母親回美孚老家。當時他的醫生朋友曾語重心長奉勸話「插咗喉,通常都除唔返,成世。而且好易感染肺炎」,不過林利堅持接母親回家。回想那段日子,林利帶點苦笑說︰「嗰時屋企冇工人要一腳踢,唔請原因係唔想將家人責任推畀人。嗰幾個月不停抽痰,夜晚最多,冇得瞓,又要扶佢去廁所,嗰段時間都呆呆滯滯。」經過差不多兩個月,奇蹟發生,林媽媽不但可以自己下床,亦不用靠呼吸機幫助,經醫生診斷癌指數已大幅下降。林利話媽媽每日生活很簡單,每日一早起身陪媽咪行荔枝角公園,之後會回家補眠,吃過午飯小睡片刻又落樓行過。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner