落場客串陪演員血戰 
導演周顯揚壓力爆煲

更新時間 (HKT): 2021.05.10 02:00
■周顯揚指去年疫情下電影映期受阻,又要搬寫字樓等,令他好大壓力,皮膚出現問題。

今年42歲的導演周顯揚,2009年憑電影《殺人犯》打響名堂,早前他接受《蘋果》訪問時,透露去年疫情下,與編劇太太杜緻朗同時為《真.三國無双》、《我們永不言棄》做後期及籌備新戲,適逢太太懷孕,兩人險壓力爆煲,他說:「一時間幾樣嘢加埋,令佢好辛苦,尤其去年我哋為咗維持公司,要搬到較細寫字樓。太太懷孕後期因為個肚重,要企喺度寫劇本。當時我好心痛,都有壓力、內疚,太太最終爆濕疹,我亦有皮膚問題,大家都好大壓力。」幸好互相扶持下跨越重重障礙。

帶大女開工

《真.三國無双》現正上映,周顯揚說拍攝時曾帶大女周令昂在身邊,因為不想因工作忽略照顧女兒,但今年3月細女出生,未來因為疫情,應該不會帶她周圍飛︰「嗰陣唔想離開個女太耐,所以就犧牲香港返學時間,帶埋外父同外母一齊去幫手睇住。其實小朋友三、四歲時有外遊經驗都好,佢𠵱家敢於表達自己,好多嘢講,八婆嚟!」他指不憂心學習方面女兒會比同齡小朋友差,又指女兒對電影完全沒興趣,反而想做科學家。女兒的出生更影響了他的拍攝風格,不像早年的《殺人犯》及《大追捕》較暗黑,反而會講有出路、有鼓勵的訊息。

整港式美食

周顯揚愛與演員共同進退,拍攝《真.三國無双》時,不少演員在攝氏近50度高溫孭着幾十磅盔甲,周顯揚亦有客串一角和大家「血戰沙場」,他說:「親自落場好處係感受吓演員個角度,明白佢哋同個鏡頭嘅關係,對導演部戲好有幫助。我好想了解佢哋嘅世界,之前我會陪埋佢哋訓練打拳,剃頭都試過幾次。」細心的他亦親自下廚,煮咖喱雞翼及煲靚湯慰勞大家,原來他怕大家離港太久,會掛念家鄉美食,才靈機一觸大搞「周仔記」,製作港式美食。

提到古天樂被刺傷眼睛縫八針,周顯揚指拍戲受傷有時難預計︰「我當時好驚,佢竟然話拍埋先,話部機器租返嚟好貴,我梗係堅持要佢收工,好在吉人天相。」

撰文:祖李

娛聞樂陪你走遍全球追星,即Like「娛果」FB 專頁!
BannerBanner