專訪丨63歲魯振順譜黃昏戀極速回春恨生B 不敢「偷食」怕天打雷劈

更新時間 (HKT): 2021.05.11 06:00

63歲的「綠葉王」魯振順多年來受角色影響被誤解性向成疑,近日爆出秘戀,他去年底重遇41年前參加歌唱班的小師妹Julie,57歲任職保險理財的Julie仍是獨身未嫁,二人相處僅一個月便認定彼此是終身伴侶,已決定明年10月在迪士尼舉行嘉年華會婚禮

他們絕對是「命中注定」,Julie去年「尋人記」找到魯振順後,主動聯絡,女追男隔重紗,魯振順曾提及想食住家飯,Julie見面時細心用暖壺帶來自製愛心餃子和靚湯,魯振順食到有媽媽的味道,感動得哭起來,心中已認定Julie是亡母給他派來的天使。「我從來冇安全感,佢畀到我有安心感覺。我咁嘅年紀,主要求個女伴,過埋嗰幾十年。我哋以後每一分,每一秒都要盡量珍惜,追番失去嘅時間,所以我哋一齊就似細路仔初戀,佢畀到我呢種感覺。」害怕孤獨終老的魯振順發覺找了半生的另一半就在眼前,有意成家立室,Julie說:「重遇番一個月左右,大家就認定要一齊。」魯振順索性改口叫未婚妻Julie做「太后」。

情歌冧未婚妻

這段黃昏戀更不斷升溫,當初源於一壺愛心餃子,這次訪問,肯定要再大測試未來順嫂的廚藝,所以就由街巿出發,近日回春的魯振順笑言:「我哋嘅第一次就畀咗《蘋果》,我哋真係未試過去拍拖去街巿買餸同下廚。」Julie答應在鏡頭前再為魯振順下廚,親手包韭菜餃和煲鱆魚粉葛湯:「我煮畀順順食嘅嘢,全部自己試過得先畀佢食,我點捨得糟質佢。」愛心餐不能馬虎,Julie帶隊到街巿選料,魯振順緊隨幫幫手拎餸,十分合拍。

不出半小時便買齊材料,魯振順和Julie拍拖返歸,Julie有賢妻潛質,她一手落力準備,不介意魯振順等食,反而他主動提出協助,Julie用菜刀切細豬肉,就交魯振順剁碎,她再去煎魚煲湯,自稱首次剁肉的魯振順其實刀功不錯。如是者分工合作,Julie調好餡料便動手包餃子,魯振順轉身清理廚房,大家很有默契,其後Julie又叫魯振順一齊包餃子,他就將童年跟媽咪學的技巧顯示出來,說真的,魯振順包的餃子帶摺痕,造型精緻不遜Julie。兩人一邊包餃子,一邊閒話家常,「卡拉之星」魯振順更清唱了陳百強的《有了你》:「有了你頓覺輕鬆寫意,我每日,每天都想見你……」冧爆的Julie都和唱起來。

愛心餃食唔停

當煮好餃子,Julie叫魯振順趁熱吃,他大啖吃後讚:「今次食到即包即煮嘅新鮮餃子,同暖壺拎過嚟味道好唔同,仲點埋黑醋蒜茸汁,更加好味呀!唔食就蝕底,我恨到,佢執到。」聽到未婚夫爆埋金句嘉獎,Julie好有滿足感,雖然老火湯控制不好火候煲乾水有燶味,略嫌失準,魯振順還是感恩Julie一番心思把湯喝光。難道要留住男人個心,真的要先留住他的胃?「老婆煮嘢食叻,男人幾生修到,仲『偷食』就天打雷劈喇!我肯定唔會,我係住家男人。」大胃王魯振順自爆可以一次吃30隻餃子,還風騷講笑Julie未夠60歲冇飽飯食,Julie詐嬌:「我都係你㗎喇。」魯振順答:「你梗係我㗎喇!唔係邊個㗎?」二人打情罵俏後,魯振順又跟Julie咀嘴。

問到魯振順給Julie廚藝多少分?「世間上冇分數可以形容佢,爆晒呀,佢係『超級多功能老婆』,佢好多嘢上網一撳學番嚟,佢知我鍾意食餃子就上網學,畀我食嘅嘢都好健康,知道我水腫會上網搵啲食療煲畀我,之前又煲素湯畀我,天然冇味精,好好味。記得佢之前返內地,臨行擔心我冇嘢食,買咗好多番薯煲定放我雪櫃,畀我分開慢慢食,好似細個聽古仔,阿媽怕個仔餓壞,出去前喺佢條頸掛個大餅咁。」Julie對魯振順所做一切從心出發,「唔係用手段去留住佢,想佢開心先用心去學、去煮,有良心嘅人係識感恩、識欣賞,亦自然會appreciate你為佢做嘅嘢。」Julie就欣賞魯振順優點多多,「佢其實好sweet,好細心,人好聰明,反應快又有幽默感,成日WhatsApp都引到我卡卡笑,撞番佢我笑點低咗,好失禮。」

拍拖至今約半年,仍是熱戀期,但卻給人有老夫老妻的感覺,魯振順和Julie相處至今從未有過拗撬,「時間咁寶貴,唔好要嚟鬧交,如果真係意見唔同,我哋咪講道理囉!」Julie有信心將來婚後生活習慣不同都能容忍:「同人相處冇必要為小問題傷感情,好錫佢咪體諒佢,不過要合情合理,唔可以無理取鬧,我係好傳統女性,我覺得做女人要溫柔體貼,一個屋企裏邊唔可以兩個人都太強硬。」魯振順非常認同:「好多人話嗌交都算係磨合,我哋冇見41年,見番面冇隔膜,真係乜都講,諗嘢又一樣,感覺好神奇,佢就似我同好耐冇見親人團聚。一個未嫁,一個未娶,決定一齊就要追番以前嘅時間,只會珍惜時間太少,玩都玩唔切,開心都嚟唔切,點會用嚟嗌交,呢方面Julie好懂人,好成熟,同佢講笑,佢完全玩得。」Julie坦言能嫁魯振順是自己「執到寶」,魯振順爛gag回應:「大家都係寶,至緊要唔好老土。」

怕老婆會發達

魯振順認同年少氣盛未必情長久,去年重遇卻是right timing,「我都好大男人主義,我嘅嘢會set死晒,唔可以違反我心中定義,所以後生時容易黑口黑臉對人,而家人大咗唔會咁。」魯振順在Julie前如小綿羊,百般遷就,他說:「前幾日佢見我攰同我按摩,搞到我膊頭起水泡甩皮損咗,千祈唔好得罪佢,佢話一隻手指捽死我。」此言一出,不禁令人想到怕老婆會發達?魯振順說:「我係尊重佢對外、對內都得。」Julie明知魯振順「作料」,沒反駁只管笑,還讚他越來越好,Julie拒絕評分,「我覺得認識一個人唔係畀佢幾多分,係講感覺,唔可以話做得好少少就加分,做唔好就減分,佢某一次做差咗,可能工作攰啫,順順品性純良,心地好,佢嘅勤勞用咗過去幾十年累積返嚟。」兩人同樣年過半百,各自都有獨立經濟能力,Julie婚後不會掌管家中財政:「我唔會管佢嘅錢,我覺得男人要多個錢傍身。」

他們竟還恨生B,Julie正看中醫調理通經:「我知難度好高,我近排學吓biology(生物學),睇吓點樣令機會大啲,中醫都唔會寫包單,大家有良方都可以share畀我,都係盡人事,強求唔嚟,而家人人話長命120歲,咁我調理好身體都係冇壞。」可有想過沒有足夠時間教育下一代?Julie解釋:「我哋兩個都係合情合理同思想正面嘅人,如果幸運有個小朋友,我哋都會好好栽培佢,佢長大都會對社會有用,我哋都唔知自己幾時走,但相信小朋友可以面對將來。」魯振順也說:「小朋友都係天賜禮物,我哋盡人事咋,希望在明天。我哋各自有養貓狗,知道照顧寵物都要時間,何況係人仔責任重大,肯定要更多時間,唔可以貪一時之快,而家先兩個人健康開心生活先,總之一切順其自然。我娶佢返嚟都唔係要個工人或者生仔機器。」家有三狗的魯振順明年迎娶帶着貓咪出嫁的Julie,屆時二人連同四毛孩的六口之家肯定已好熱鬧。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner