【娛樂人物】57歲未婚妻睇中醫調經 
魯振順回春博生B

更新時間 (HKT): 2021.05.11 02:00

現年63歲的「綠葉王」魯振順多年來受角色影響,被誤解性向,去年底他重遇41年前參加歌唱班的小師妹Julie,已屆57歲、從事保險理財行業的Julie仍獨身未嫁,二人相處僅一個月便認定彼此是終身伴侶,決定明年10月在迪士尼舉行嘉年華會婚禮,Julie更看中醫調理通經計劃生B。雖然是黃昏之戀,但兩人視之為初戀,不時打情罵俏兼咀嘴,煙韌到暈。

魯振順憶述未婚妻Julie去年心血來潮上演「尋人記」,找到他後女追男,知道他想食住家飯,Julie見面時用暖壺帶來自製愛心餃子和靚湯。魯振順吃到過世媽媽的味道,感動得哭了,他坦言︰「我從來冇安全感,佢畀到我安心,我主要求個伴侶過埋幾十年。我哋好珍惜,想追返失去嘅時間,一齊就似初戀。」Julie說:「重遇返一個月就認定一齊。」魯振順還改口叫Julie做「太后」。

「睇吓點令機會大」

魯振順和Julie情到濃時還恨生B,Julie自言正看中醫調理通經:「我知難度高,近排學biology(生物學),睇吓點樣令機會大啲,盡人事。」可有想過沒有足夠時間教育下一代?Julie解釋:「我哋兩個都思想正面,如果幸運有小朋友會好好栽培佢,我哋唔知自己幾時走,但相信小朋友可以面對將來。」魯振順也說:「小朋友都係天賜禮物,希望在明天。我哋各自有養貓狗,知道照顧寵物要時間,更何況人仔。𠵱家先兩個人健康開心生活先,總之一切順其自然。」

魯振順和Julie拍拖半年仍是熱戀期,兩人未試過拗撬,Julie笑言對婚後生活融合有信心:「錫佢咪體諒佢,我係傳統女性,覺得女人要溫柔體貼。」魯振順表示認同:「冇見41年,見返面冇隔膜,好似親人團聚。決定一齊開心都嚟唔切,點會嗌交,Julie好懂人、成熟又玩得。」

「一隻手指捽死我」

年少氣盛時未必情長久,魯振順坦言:「我都好大男人主義,後生時容易黑面,𠵱家人大咗唔會咁。」他在Julie面前如小綿羊,笑說:「前幾日佢見我攰同我按摩,搞到我膊頭起水泡甩皮損咗,千祈唔好得罪佢,佢話一隻手指捽死我。」問他是否怕老婆會發達?魯振順說:「我係尊重佢對外、對內都得。」Julie則讚男方:「順順品性純良,心地好。」兩人年過半百,各有經濟能力,Julie指婚後不會掌管家中財政:「唔會管佢嘅錢,男人要多個錢傍身。」

撰文:比華利

場地提供:V-ZUG HK

娛聞樂陪你走遍全球追星,即Like「娛果」FB 專頁!
BannerBanner