森美叫Edan改名「女婿安」惹愛女don’t like 讚MIRROR夠耀眼:呢啲就係青春!

更新時間 (HKT): 2021.05.12 14:38

人氣男團MIRROR一連六場嘅九展演唱會,噚晚圓滿結束,在一票難求情況下,尾場門票更被炒高至20萬,連影帝古天樂都嚟撐場,就知MIRROR人氣高企,MIRROR個唱贏盡掌聲,而古仔驚喜現身,即惹來全場尖叫歡呼,森美及小儀噚晚亦係座上客,今早於電台節目《早霸王》,佢哋都談及現場所見情況,小儀稱古天樂入場時,全場尖叫震耳欲聾,氣場十足,小儀噚日坐觀眾區,完全感受到鏡粉投入及和諧嘅氣氛,而森美笑稱自己坐喺古天樂嘅嘉賓區。

森美回想演唱會片段覺得幾感動,「我見佢哋喺台上講,譬如Edan講如果唔係去咗梅窩camp,佢開頭都冇信心可以去到3年,Alton講以前佢哋一出道,網上有人講『MIRROR三年後仲喺度先同我講』」聽Lokman講完,森美即刻望MIRROR佢哋對眼,「我感覺到佢哋係一條心,我認為呢個係重要啲」。

森美又笑指睇騷有留意呂爵安,佢解釋因為屋企有個小妹妹好鍾意,因此比較留意呂爵安一舉一動,森美笑說: 「本來我唔知佢係邊個,我見佢噚晚叫『小儀豬』,佢又攬到小儀實一實。」小儀聞言即好大反應:「唔係我!佢係向另一方向,佢妹妹叫『小如豬』,不過我同佢係好朋友。」森美笑稱嚇死:「『小儀豬』我心諗呢個男人咩事!之不過我噚日講完一句說話,我真係驚!咁啲記者訪問我,見我拎住個『爵』字,問我係唔係『爵屎』,我答唔係,我屋企有人鍾意佢,遲啲叫佢改名『女婿安』。」

蘋果好多人

小儀指老竇爆出「女婿安」通常有啲人會覺得爸爸舉動好冧,亦有人覺得等老竇回家先揍佢,森美自爆睇騷去到一半已收到愛女電話:「我一聽就有個女仔同我講,你睇WhatsApp就收線,見到『你唔好再講我喇』,哈哈!我答『我冇呀!我冇呀』,阿女話《蘋果》出咗呀!我心諗豈有此理,個騷去到一半咋喎,我只好話講吓冇嘢嘅。」

森美當時極速轉移話題:「好在你冇嚟呢度好多人,阿女話『《蘋果》都好多人(睇)』,阿女仲話『I don’t like you』,我答『我知You Love Me嘛』,佢話『Not Today』……」在旁嘅小儀大笑,Marco亦笑佢得到懲罰,小儀笑住講而家年輕人追星唔一定想同人講。

森美又指阿女一向聽外國歌曲,好少聽本地音樂,「我有一個習慣,一上車就播家人playlist,佢哋會講點解聽呢首歌……直到有一次聽到《狂人日記》、《E先生連環不幸事件》,我就知佢鍾意」,Marco笑住講:「現場好多人,《蘋果》好多人,電台都好多人(聽),你又再講多一次。」森美反駁:「電台冇咁多嘅!佢而家返咗學。」

完騷後見到呂爵安,對方已知道自己叫「女婿安」,森美感到愕然:「之後見到呂爵安,佢話『女婿安』,我話你都知?真係快,你開緊騷。」

森美亦指大讚姜濤畀心機演出,「要全世界話你好,係好難做到,噚日睇到姜濤最尾嗰part,其實去到最尾好多時啲歌手都會將隻舞簡化,但係佢冇,而我見到佢係盡力畀大家見唔到佢攰,就算氣聲都繼續盡力去唱,呢啲就係青春!人生年紀大咗就畀一啲自己handle到嘅事畀自己做,有啲最尾會做少啲,覺得佢係不顧一切,死咬住去演出,呢啲就係青春!感受到MIRROR就係青春。」Marco亦認同有啲歌手有時年紀大「回塘」就只希望做得舒服而已。

輪到玩遊戲時,講起情人之間「有一啲唔關佢嘅秘密,佢都要知」,森美認為結咗婚就溝通,Marco寸佢:「阿女鍾意呂爵安,你都周圍同人講,阿女都冇同你結婚,《蘋果》呀大佬。」小儀搞笑說下星期要玩「最怕老竇」遊戲,「話我鍾意呂爵安,仲要叫佢做女婿安」。

除此之外,森美也欣賞鏡粉為偶像嘅付出,「以前fans覺得你邊識嘢,而家啲fans係希望我鍾意,都希望你都鍾意佢,呢種新嘅感覺,我又幾喜歡,因為係互相幫助,佢哋知道自己代表偶像,有教養理智嘅fans唔係個個都有,相信係MIRROR大嗰啲fans去教細嗰班,fans係努力去幫佢哋做推廣,讓偶像多啲人識,幫偶像行台宣傳新歌」。

Dark Image較耀眼

森美認為MIRROR個唱的solo環節,編排落咗好多心機,令佢有啲喜出望外,見到十二子可以發揮所長,「呂爵安自彈自唱,阿Jer現場表演都係耀眼,Tiger、Frankie、Jeremy及Stanley搵啱咗自己嘅歌,擺法幾好,佢哋都有種妖嘅味道,呢種味道係要經營,Jeremy原本個樣冇呢個特色,到佢換咗髮型,再加埋跳絲帶舞,我感覺到一個日本style嘅star喺台上,佢哋幾個係有Visual Rock嘅感覺,我當時覺得MIRROR係有dark image,我直情諗咗個名,一斬開佢哋就係MIRROR Dark Image,應該係ERROR、MIRROR、Dark Image,咁佢哋呢一part,我係喜歡,唔係齋邪氣,有啲陰陰哋,佢哋係誘惑你,我係入到戲,挑逗性好高,一啲曳曳同違和感都冇,所以我覺得啱佢哋,呢幾個要發掘多啲」。

森美讚Frankie幾靚仔,好有後生版孫耀威外表、跳舞又似城城,全程幾吸引森美去睇,而Stanley肌肉線條最好睇,佢下胸位置真係操得唔錯,Alton則似日本SMAP成員中居正廣,有主持嘅才華同特質,好有膽量去做,「唔知呢個係唔係佢將來嘅方向」。

此外,電台節目《在晴朗的一天出發》主持林海峰及盧覓雪亦有提及MIRROR臨完場前,姜濤發表感言時,佢高呼「香港加油!」然後舉起手指公,台下觀眾即掌聲如雷,之後姜濤再大叫「香港樂壇加油!」同時又講起古天樂睇MIRROR尾場演唱會,盧覓雪指鏡粉十二子後援會好勁,而家香港好少見,盧覓雪又指估計古天樂撐場,應該好快同MIRROR有合作。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner