出道28年丨50歲莫文蔚堅持性感登紅館告別:而家係最好時刻去做

更新時間 (HKT): 2021.05.12 20:00
蘋果日報

近年多在大陸發展的莫文蔚(Karen),早前宣佈下月11至13日假紅館舉行的《絕色莫文蔚世界巡迴演唱會》,將會是她告別大舞台的最後演出。日前她為宣傳個唱受訪,歌單有逾半為廣東歌作品,迎合港迷口味,提到服裝方面,向來前衛大膽的她明言:「一開場就會嘩一聲嗰種,性感就預咗啦!」

下月開騷時剛滿51歲的Karen,對於自己相隔16年重踏紅館舞台,她坦言:「隔咁耐已經冇咗個feel,一直諗唔知幾時再有機會喺紅館做騷,所有嘢都睇天時地利人和,覺得而家係最好時刻去做,仲要喺自己屋企(指香港)做最後一次,終極大型演唱會。」

對於今次是其最後一次的大型演唱會,Karen解釋:「我2018年開始巡迴,度個騷時已經覺得去到呢個位可以停,都夠啦!之後可以再做第二啲嘢。因為我鍾意創新,唔係永遠做死一樣嘢,唔同階段有新靈感帶畀觀眾,10幾年來都不斷巡迴,模式又一樣,只係style唔同,感覺一直重複,覺得而家係最得心應手一個位,去做最好一次作圓滿句號,下次做另外一啲新科技演出。」

家庭放次要被老公詐型

Karen於2011年嫁給德國籍老公Johannes,夫妻倆一直過着「空中飛人」的生活,不過,也許隨着年齡增長,令她的想法有變,一句「圓滿句號」更令外間揣測她在巡迴個唱後退休,與老公過清閒生活,她即澄清:「又唔會!我咁鍾意表演,可能會調校節奏。以前一直衝一直跑,我結咗婚9年,嚟緊第10年,一路將工作擺第一位,其他擺咗第二位,唔係幾啱嘅,未來將家庭放第一位平衡啲,幾熱愛工作都好,唔代表日日要跑緊騷,可以用唔同方式去工作。」

婚後多年仍以工作最優先,Karen直認老公有投訴詐型:「其實都有㗎,詐詐哋咁啦!佢好就我,我又側側膊,佢知道我好熱愛工作,而家有共識,心態開始轉變,未來大家節奏會配合得好啲。」Karen透露老公已返港一起生活,演唱會必定前往捧場。此外,有不少好友自告奮勇做嘉賓,但因疫情問題要到時才落實。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner