MIRROR演唱會丨尾場體力爆盡翌日冇假放 Lokman:紅館一定開!

更新時間 (HKT): 2021.05.12 01:40

MIRROR尾場出盡力放盡唱,完騷後12子回到公司受訪,他們異口同聲說要食所有不健康的食物,尤其是騷肌五子,Anson Kong說:「我同Tiger都好啲, Lokman、Frankie、Alton 節食得比較長時間。」他們又取笑 他們食足三星期節食餐,Lokman自備不少青瓜西芹似隻羊,由於演唱會之前MIRROR要入camp拍節目,所以要出camp才節食,並出絕招,將飯盒過熱水。

頭場完結後,花姐嚴格給了60分及格分,尾場Lokman說唔識畀分:「尾場好緊張,想做好每一個細節,要諗點樣做,冇留意到好多,落咗台感覺唔係好攰,好似無盡力咁,但佢哋話OK喎。」Stanley承認尾場好易感動,會甩嘴扣分,但感染力變得好好。

演唱會爆盡翌日冇假放

MIRROR不少成員在飛船、encore時爆喊,6場以來他們一致認同係Jeremy、姜濤及阿Jer是喊包,今晚有在飛船上喊的阿Jer說:「我每次見到Jeremy喺飛船上喊,我都好感觸,今日我見Anson Lo,我都忍唔住,轉頭見到Jeremy已經喊緊。」惟獨Edan完騷後冷靜,不停說「Good Show呀Good Show」被Alton取笑要睇醫生。開騷前Edan與Anson Lo失聲,他們說沒有打開聲針,食藥足以控制。姜濤父母在母親節入場,他再次多謝爸爸媽媽:「屋企人行動唔係好方便,辛苦佢哋過嚟睇,都好開心,因為體力未必夠,所以唔係睇咗好多場。」

姜濤在開騷前說演唱會後要休息,隊友透露他攞假,但姜濤則說:「未必係連續,中間有工作。」講到工作,原來Lokman、Anson Lo、Frankie舉手表示,演唱會翌日已經要開工,他們都說感恩有工作。

尾場癲價黃牛飛雖然無人問津,但1.7萬黃牛就成功賣出,Lokman顯得驚訝:「如果佢有嚟,應該要DM我哋。」但有人買黃牛受騙,MIRROR覺得不應該買黃牛,Lokman肯定地說:「紅館一定開!」但他說不知有沒有入紙,但想做更好、更多人的演唱會。6場都有好前輩支持,AK覺得終於有一種融入圈子的感覺。

花姐:想做紅館未必係年尾

經理人花姐受訪時就自稱「低層」,否認曾入紙紅館,她有要求地說:「我係一個唔貪心嘅人,我係想大家睇到新嘅嘢、有質素嘅嘢先會擺上紅館。我冇話唔做,但係要適當時候。」又指年尾空出的紅館期,要再仔細研究:「工作安排未至於要去到年尾,大家心入面都想做紅館,但係咪時間適合,要再開會傾吓,但呢幾日真係太多嘢好攰,大家都要休息下。」

有傳姜濤今年會拍電影,對手是毛姐毛舜筠,花姐承認有計劃讓姜濤今年拍戲:「我哋有plan姜濤處女作喺今年發生,但詳情係點都要有待公佈。劇本啱唔啱都要再傾。」她又承認經常與彭秀慧密斟:「我同彭導演成日都有傾呢啲嘢,我覺得佢係一個拍嘢好細膩嘅女導演,我好希望姜濤可以遇到一個好似佢咁嘅導演,但係咪真係合作,都要再傾唔可以倉促,始終都係佢第一次。」姜濤受訪時稱好期待自己第一套戲,但要等公司安排,之後會了解清楚。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner