193金菇size變猴頭菇 ERROR流「死亡行星治療」成男士救星

更新時間 (HKT): 2021.05.13 21:11

除了MIRROR唱歐國盃主題曲參與盛事,今屆now亦安排強尼回歸做「講波佬」,今次將會拍住ERROR及其他KOL主持節目,相信「全尼」有以往球彩台的經驗,今次難度不會太大。

今次ERROR齊人受訪,保錡擺脫上月口罩小姐決賽的「雪藏」狀態,不過仍然是最少開口兼說戒粗口,惟獨格仔導演Mike的節目豁免,自稱做「保錡字典」的肥仔即解釋:「佢意思係除咗ERROR節目會爆粗,其他節目唔會。」193指ERROR在直播中不會爆粗,又抽TVB水說:「我哋冇『足金X猴』啲嘢。」保錡接獲拍攝廣告工作,193解釋:「公司冇話過雪佢,係佢自己想休息,而家人哋逼佢拍廣告,真係要囂呀!」肥仔補充:「個廣告真係啟發到佢,覺得值得拍先拍嘅。」結果保錡反而沒有發言機會,只可認同隊友:「係呀,講得好,滿意!」

除了講波,有網民建議ERROR做東京奧運主持,保錡自薦想為短跑做旁述,他解釋:「講10幾秒就收工,呃騷錢一流。」193想講籃球,肥仔最終揀了旁述女排,不過阿Dee以為是冬奧,自薦講冰壺,卻被隊友取笑,最終轉揀體操,193取笑說:「男人啲緊身褲,佢鍾意。」阿Dee即場發揮創意:「嘩,美國真係大抽過墨西哥!」

阿Dee一噸啤酒飲得兩支

《ERROR自肥企画》最近成為觀眾熱捧節目,193與保錡多次遭「死亡行星」攻擊,193在「侏羅紀公主」中慘被擊中下體,今日他說:「嗰次真係有諗過入醫院,我係有少少休克,唔係做戲呀!」他又指當時已經又紅又腫:「佢哋叫我即場check,不過有兩部機對住我咁近影,真係好難check。」他笑說回到家發現真的變大了:「本身係金菇,而家變咗猴頭菇。」ERROR更為形容為「死亡行星治療」,阿Dee更建議:「所有男士都可以試吓。」

阿Dee就在「啤.生與死」贏了一噸啤酒,他說:「如果由物理角色分析,絕對係飲唔晒,再飲就會長期缺席。」但追問之下,阿Dee卻稱:「我諗⋯⋯我飲咗兩支。」193即刻補飛:「我真係好鍾意飲呢個牌子。」

節目亦令193的感情問題浮面,網民懷疑他與「Dee姐」陳海寧(Isabella)早已撻着,但他今日避談:「呢啲嘢留畀我經理人(濟哥)答。」ERROR又幫濟哥搵女友,稱濟哥單身住西貢獨立屋有養貓,是城中筍盤。另外193與吳業坤的cover,他說一年前與歐國成(Travis)唱過坤哥的歌,坤哥提議合作,193又認叻:「今次玩吓,知我咩料啦,我係歌手!」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner