吳若希不忿被重提「咖喱事件」疫情下撩網民赴TVB電視城對質

更新時間 (HKT): 2021.05.13 12:01

TVB藝人一向多古靈精怪,譬如至今仍未了解完學歷的蔡思貝、特別有長輩緣嘅傅嘉莉、不肯簽解約信嘅黃心穎等,謎一般存在,仲有一向吱吱喳喳「好打耳」嘅吳若希,周不時同網民開火爆罵戰,言談open得嚟又夠潑辣,完全冇偶像包袱。

噚晚吳若希開心分享YouTube自家節目,跟老公拍攝「相敬如賓週」環節,兩公婆挑戰煮辣雞料理,吳若希早前上TVB節目《美女廚房》煮出雞肉刺身,被評「又生又臭」,一眾評判給負分,當時佢更指「平時給老公食得肥肥白白」,被網民封為新地獄廚神。正所謂喺邊度跌低,就喺邊度企返起身,吳若希決定由雞開始整起,好好為廚藝平反。

重提「咖喱事件」

點知有網民疑撩交嗌在吳若希FB留言聲稱彼此見過面,「咖喱!好耐之前聲雅廊,你坐過我,以前你啲枚好屎啦,不過飲酒就唔賴皮都算幾好玩,幾時有機會再同你劈過」,吳若希當然不甘示威即反擊:「唔識你?你邊位?」該名網民鍥而不捨繼續狙擊:「你見到我就知道!之前成日落去搵你玩。」

吳若希叫對方出嚟當面對質:「我聽日返TVB,大概中午12點收,聽日見,PM我你電話。」該名網民再回:「而家你巴閉啦!大明星仲識得我咩?電話又改埋,而家你連你契爺都少搵啦(佢話我知)。」吳若希爽快回答:「得啦!見到面先啦,唔見點知識唔識你。邊個我契爺?我最近窮,你幫我搵返個契爺出嚟啦!」另有網民好奇為何叫咖喱,該網民稱:「佢以前中文名差唔多音嘛!記得中文名好似叫家妮。」

在疫情反彈下,吳若希竟然主動撩對方在TVB見面,「我PM咗你叫你留電話,我聽日開完姊妹淘就搵你,如果你想參觀埋電視城,畀埋你身份證同全名我,我幫你報上公司。」該網民拒絕赴約:「我唔想參觀電視台,畀個貼士你,我以前成日寸你個名『咖喱雞』,之後就鬧我隊我飲,咁樣你記得啩。」之後吳若希便沒再回覆。

無懼世俗眼光?

另有網民好奇問:「請問你有冇喺聲雅廊做過?」吳若希回覆:「無喎~講咗咁多年都仲講?!」有歌迷稱由吳若希初出道嗰幾年已經鍾意佢:「點解近呢幾年要做到自己咁乞人憎,作狀、浮誇、低劣、MK,仲要成日公開唱老公、唔畀面老公,係咪真係道行高到完全唔介意世俗眼光,BTW曾經嘅《越難越愛》我係鍾意你,但自從《街頭魔法王》後真係好反感。」

一向語出驚人嘅吳若希,出道以來負面新聞一籮籮,早年被周刊指佢曾以藝名「咖喱」在聲雅廊返工,她已多次否認,一時又被寸「御夫有術」經常開live或拍片恰老公,早前吳若希一家去農莊玩更爆出「關公災難」,事後農莊將佢遊玩嘅相上載facebook感謝到訪,吳若希隨即留言警告農莊,「照片未經公開授權公開」,要求對方「請盡快移除」,惹來不少網民反感,吳若希跟網民爆罵戰,噚日出席活動,吳若希表明網民喜歡睇佢鬧交及爭論,不介意收錢做「潑婦」開live,昨晚FB留言亦有不少網民寫下「影片未經授權公開,請盡快移除」來寸爆吳若希,fans見到即為偶像擋箭:「Jinny加油!唔使理咁多無聊嘅人,支持你嘅人會一如既往支持你!一直聽你嘅歌,睇你嘅節目!」網民認為清者自清,勸佢不要動氣。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner