獨家訪問丨播音皇帝李我下月1日設靈 蕭湘叮囑亡夫:夢中見

更新時間 (HKT): 2021.05.13 22:00

香港播音皇帝李我於本月5日與世長辭,享年99歲。1946年開始做播音小說的李我叔,與結婚逾71年的太太蕭湘一直相守相依,痛失老伴的湘姨接受《蘋果》電話訪問,透露李我叔的喪禮定於6月1日在香港殯儀館設靈,翌日出殯,由於疫情關係,不會設公祭,湘姨說:「大家有心嘞。」

雖然李我叔已走了10多日,但湘姨的心情仍未平復,「你都想像到情緒唔會好,又瞓唔得,又食唔得。」回想李我叔臨終那天,湘姨慶幸自己能趕到醫院,陪李我叔最後一程,「真係好彩,我能夠送佢最後一程,我都覺得安慰,佢喺5月1號夜晚8點幾入將軍澳醫院,呢年幾兩年,其實佢都出出入入醫院,年紀大機器壞,佢先兩年開咗肚話腸扭結,嗰次過到關,你知老人家又唔食嘢又乜又物,好多病痛,嗰晚8點幾入院,半夜3點幾醫院打嚟,我知唔係好事,即刻搵姪女車我去醫院,嗰時佢已經好危,終於拖到幾日。」

直至5號那天,李我叔進入彌留狀態,湘姨再趕到醫院,「好彩姪女有車,如果唔係,我都幾十歲老嘞,深夜叫車叫唔到,終於我都算好彩,一直摸住佢隻手講好多說話,佢好似有感覺,知我安慰佢,佢眼中有淚光,我用紙巾同佢印眼,紙巾真係濕。」湘姨語帶哽咽說:「我話你唔使掛住我,有好多人錫我,唔緊要,你好好地離開,喺夢中見吓我啦!終於陪到佢最後一口氣,多謝你有心啦!」

湘姨於20歲嫁給李我叔,她比李我叔細7歲,畢業後本想教書,其後發現廣州風行廣播電台招考播音員,便決定前往投考,最後成功被取錄,之後跟李我叔學藝,本名何侶雲的她,由於身材瘦削,李我叔為她改藝名時,便想到「蕭湘」二字,有瘦弱又有漂亮的意思。湘姨曾在訪問中透露,她和李我既是夫妻,也是好拍檔,能夠走在一起是緣份。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner