細貓應智越錯失入MIRROR冇後悔 缺家人支持失控淚崩

更新時間 (HKT): 2021.05.14 17:59

應智越(細貓)昨晚為陳志雲《Stephen.傾》網上節目做嘉賓,細貓透露4歲時爸爸已過身,他和哥哥由媽媽獨力撫養,面對疫情前路未明,細貓直言家人好擔心,說時已忍不住落淚:「細細個哥哥就話,我哋冇老豆,畀心機做人(喊)。我唔係好想提屋企人,因為前兩日哥哥先哦完我,阿媽又想我有更多打算......阿媽話本身屋企乜後台都冇,你行呢行都冇機會,話舞台唔會畀機會冇背景嘅人,我努力練習都想證明畀哥哥睇。」27歲的細貓自言在韓國讀音樂時,見到比自己細4、5年的朋友已有一番成就,自覺不夠爭氣,亦開始對自己缺乏信心,「可能係上天畀我嘅考驗,本身有諗過放棄」。

細貓是《全民造星》十強之一,最後得第七位,被問到為何比賽後沒有加入MIRROR,他解釋:「當年有另一份合約在身,同花姐(黃慧君)傾過都未能解決。而且媽媽培訓我,係畀我作歌,我有同花姐傾過好想有自己嘅作品,但男團有一定競爭,唔知自己係咪嗰位幸運兒,公司最大力推你嗰位。因為自己經歷過,喺大陸參加男團時最唔埋堆嗰個就係我,有自卑感。」有沒有後悔錯失機會?細貓說:「已發生嘅事唔能夠後悔,每件事情都係連鎖反應。若當年冇合約在身,就唔會參加《偶像練習生》,亦可能唔會入選《全民造星》,所以只能做好自己。」

之後提到曾勸MIRROR的Jeremy(李駿傑)不要放棄唱歌,細貓再一次忍唔住爆喊,表示看MIRROR演唱會,最大感觸是看到台上的Jeremy在自己的舞台,他說:「當初佢《造星》時想放棄,我覺得佢一定得,見佢有自己嘅舞台好戥佢開心。佢想放棄,我就一直拉住佢,同佢講一定唔好放棄,我同花姐講一定要簽Jeremy。」志雲鼓勵細貓叫自己「唔好放棄」,令他的情緒再度激動,不斷流眼淚,掙扎良久也未能親口說出,他說:「叫人唔好放棄好容易,叫自己唔好放棄好難。」最後志雲向細貓請教用韓文說出「我唔會放棄」,讓氣氛緩和,他最終也成功說出口,為自己打氣。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner