黃宗澤舊愛嘲MIRROR「行落旺角大把」 自我感覺良好:唔想幫佢哋宣傳

更新時間 (HKT): 2021.05.14 12:24

46歲「玻璃朱」朱庭萱原本寂寂無名,靠着林峯契家姐、黃宗澤舊愛身份,不時貼TVB藝人合照,加上多次發表撐警言論,稍為有人認識。玻璃朱日前批MIRROR「行落旺角大把」,又指鏡粉是井底之蛙,之不過玻璃朱卻在個人FB專頁,自稱是TVB及ViuTV節目主持掛帥,卻明踩ViuTV的MIRROR絕對有倒米之嫌。

近日MIRROR舉行演唱會圓滿結束,廣大媒體均有報道,輕輕翻一下就可以查到資訊,偏偏有些人自我感覺良好,「我睇唔到、我唔知、我唔理」就等於事實,發表理論後,又大大聲聲講「唔知佢係邊個」。玻璃朱前日忽然在網媒平台留言踩場:「近日呢啲樣行落旺角大把啦,真係好大驚小怪囉。究竟咩叫靚仔有才華?內地歌手王一博、張藝興呢啲就係!成班井低蛙。」亦有網民附和她的言論,之不過鏡粉則覺得這些人無聊,從來沒人叫他們喜歡,又為何要出言傷人。

怎料玻璃朱咬住不放,凌晨在FB出POST聲稱不想「擺我同MIRROR放埋一齊抽水」、又指「唔想幫佢哋宣傳,亦唔使幫我宣傳」,真的沒想到原來MIRROR要她來幫手宣傳,之後她再次留言聲稱自己講出事實嘅陳述,「我話呢啲樣旺角大把,都冇話過佢哋醜樣啦!但我真係覺得王一博靚仔好多呀嘛,又識唱又識跳仲識排舞編曲,叫佢哋走出去個井睇吓呢個世界有幾多靚仔有才華都係錯」。

有網民恭喜:「你又見報啦!」玻璃朱繼續有感自己幫人宣傳:「唔覺有咩值得恭喜喎,你恭喜Mirror利用我又見報。」她更打tag「唔鍾意塊鏡就要被公審批鬥」。另有網民留言:「Mirror擔心尾場啲飛賣唔去,想抽一抽妳水做宣傳谷谷飛,嘩佢老X即刻炒到二十幾萬一張。」

此外,玻璃朱更無啦啦牽扯大台藝人落水:「本土好多藝人歌手都好努力,點解只要係TVB就要被打壓欺凌?」網民表示不同意:「邊個TVB歌手畀人打壓呀?王浩信好戲咪一樣咁多人睇。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner