FUNKY HEROES追夢真人Show《舞志氣》 原來細路都可以好熱血|果燃上架

果燃娛樂|舞志氣

更新時間 (HKT): 2021.05.17 00:00

冇夢想,人會似鹹魚,但係有夢想,都要有決心同勇氣去實踐。有班塞豆窿絕對志氣爆棚,又好鍾意跳舞,於是組成少兒街舞團。由成團到贏得香港區內多項冠軍,再成功贏得參賽資格代表香港遠征美國,挑戰殿堂級街舞大賽,呢班細路嘅心路歷程絕對震撼人心。佢哋就係舞團FUNKY HEROES。

無人生出嚟就曉跳舞,佢哋當然亦有名師指導,邊位?咪就係電影《狂舞派》演員,綽號奶茶嘅Lydia劉敬雯囉。今個星期果燃台推介,由Lydia親自執導嘅熱血街舞真人show《舞志氣》。一連4集,每集十幾分鐘,記錄咗7位未成年少男少女,加上一位押上賭注嘅老師,點樣憑着心中嘅一團火,籌備出戰美國World Of Dance總決賽嘅過程。每集同場加映Locking(鎖舞)小教室,等大家睇片之餘亦可以郁吓手腳。

果燃娛樂丨舞志氣(第1集) 一按到果燃台足本收睇

FUNKY HEROES 2015年成團,參加過16次比賽,除咗兩次奪得亞軍外,其餘14次都勇奪冠軍,成績驕人,真係唔講得笑。直到2019年佢哋參加咗有「舞蹈界奧運」之稱的World Of Dance香港區比賽,贏得少兒組冠軍,獲得資格踏足世界舞台,代表香港到美國參賽。Lydia話:「街舞冇證書,所以喺社會上得唔到認可,亦唔似足球同籃球咁,有港隊同有校隊,但我哋今年又真係代表香港出戰世界賽!咁我哋FUNKY HEROES算唔算係港隊呢?」

果燃娛樂丨舞志氣(第2集) 一按到果燃台足本收睇

FUNKY HEROES現時有7位成員:隊長Hailey、副隊長Mizuki、隊員Satsuki 、皓嵐 、Kazaf、Claudia同年紀最細嘅一庭。隊長Hailey係FUNKY HEROES嘅初代成員,自細已經學芭蕾舞,7、8歲開始學街舞,係團隊嘅核心,亦擔當大家姐嘅角色。但要數當中最具人氣嘅,必然係跳跳紮,熱愛Locking嘅鬼馬童星,喺毛記電視頒獎禮演唱《補充練習無間做》爆紅嘅「劉小華」皓嵐,唔好睇佢人仔細細,原來已經有7年半舞齡,最初因為睇咗《狂舞派》而迷上街舞嘅皓嵐,仲同老師Lydia一齊參演咗《狂舞派3》添。

果燃娛樂丨舞志氣(第3集) 一按到果燃台足本收睇

贏得World Of Dance香港區冠軍只係起步,獎金亦不足一行14人嘅機票住宿經費,接落嚟嘅任務係要搵有心人sponsor;好彩有FILA總經理PY、生命有價主席Louis同THE YARD創辦人Charlene,佢哋二話不說,答應提供資助同借出場地練舞,FUNKY HEROES終於可以出發去美國追夢,同時去呢個Locking發源地朝聖。

果燃娛樂丨舞志氣(第4集) 一按到果燃台足本收睇

究竟FUNKY HEROES到達美國之後發生咗啲咩事?點解會搞到老師Lydia大動肝火呢?佢哋最終可唔可以喺35支少兒競賽隊伍中脫穎而出,贏得World Of Dance總決賽冠軍呢?而Lydia帶一班徒弟探訪佢喺美國學跳Locking時嘅師父Richie Rich,當呢班細路遇上「師公」時又有咩搞笑事情?

一連四集嘅《舞志氣》現已上架,無區域限制供蘋果讀者免費觀看。即刻就到果燃台收睇啦!

果燃台 | 果迷專屬嘅影片世界

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner