張堅庭評《花姐ERROR遊》班騎呢怪 網民反感:你當年唔騎呢咩?

更新時間 (HKT): 2021.05.18 15:07

《ERROR自肥企画》經已踏入播出第3周,每集驚喜爆笑位及暗藏隱喻都成新聞及討論區熱話,ERROR 4子、Mike導及Agent L人氣亦隨之然急升,氣勢之勁絕不遜於MIRROR。隨之然連帶ERROR之前拍攝的節目《花姐ERROR遊》、《花姐ERROR遊2》及《ERROR自救TV》都被觀眾上網翻看。

當中一位觀眾是於90年代拍攝一系列《表姐,你好嘢!》電影的張堅庭導演,近年張堅庭甚少執導,主要評論時事及評價其他人演藝作品,昨日在自己社交平台專頁分享欣賞《花姐ERROR遊》後感受,他寫上:「為咗唔好太落後,我開始翻睇『花姐Errors 遊』(正名:《花姐ERROR遊》),同花姐喺ViuTV打個一次招呼,仲有姜濤在旁,花姐真係勁有性格,全不修飾,樣又唔靚,又粗魯,但一個電視台肯sell失敗給社會,也是功德。因為成功、叠水、靚女、在前台主導了社會,而家有班咖哩怪(騎呢怪)受人注目,又得支持,讓三萬蚊呎價嘅社會開心吓,有長者八達通的我要撐一撐⋯⋯老實講…睇完我都鍾意咗佢哋。」

上咗岸就話人騎呢

雖然張堅庭言語間自稱為有長者八達通的人,欣賞完節目都鍾意ERROR,但用詞則引起網民覺得有不當及不敬之意,網民紛紛在專頁內留言「你上咗岸就話人騎呢怪,你當年當日唔騎呢咩?sell失敗」、「你講嘢都幾冇禮貌,字眼用得好差」、「純粹認為,唔需要對外表有咁負面評論,人人有唔同風格。其次,『失敗』?我唔見得『ERROR』有幾失敗。佢哋做嘅嘢,好多香港人都做唔到,包括張先生。如果你話佢哋sell『失敗』畀社會,咁難道TVB嗰啲叫『成功』」、「花姐說話沒尾音,不是沒禮貌」等。

近排好多人抽水

當中有網民覺得ERROR節目系列成功,是花姐肯放手給Mike導去做,有權力能放下才走出更高層次。留言中也有網民對張堅庭改觀而寫上「我一向都好尊重張導,曾經返工嘅時候同你有一面之緣,覺得你個人有禮貌冇架子,點知今日你竟然用呢啲字眼去形容一班咁用心去做事嘅年輕人,我有啲失望。」更有網民指藉此抽水「近排好多人都想抽吓水,博出位,因為你自己已經冇嘢值得人留意。」其實平日只看大台劇集的查小欣,日前也在專欄踩《ERROR自肥企画》低俗,被網民指所謂「娛樂教母」跟時代脫節。

張堅庭再作勉勵

張堅庭今日下午再在個人社交專頁,撰文回應網民留言對他評論《花姐ERROR遊》一事,他寫上:「花姐及她的一眾支持者真係好熱血,可惜不明甚麼是正言若反,而家由細台突然好似大台咁,大家不要被成功掩蓋,要繼續努力,把所有批評變做子彈,不單享受被嘲諷,還要加倍自己玩自己,這才是underdog成功之道。」有網民留言「多謝張堅庭曲線讚賞,大家加油,香港人加油,張導也是同路人。」、「某些香港人缺乏咗啲幽默感﹗」及「願意為理想而付出的人,值得尊敬。」等。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner