歐陽震華甩「收視福將」稱號 戲份不及陳瀅:我都睇電視先知

更新時間 (HKT): 2021.05.18 18:49

歐陽震華(Bobby)、馬德鐘(馬神)、萬綺雯與陳瀅主演大台新劇《伙記辦大事》近期播出,有「收視福將」之稱的Bobby坐鎮,收視應該實食冇黐牙,繼開播首周收視錄得24.7點後,不合理及沉悶劇情,加上觀眾發現劇中第2女主角陳瀅戲份,差不多超過每集的一半時間,甚至比Bobby、馬神及萬綺雯還多,令收視每況愈下之餘,網民更在討論區表示不滿鬧監製。

兩視帝嫌對手戲少

對於戲份不及陳瀅,Bobby與馬神今日出席宣傳活動時被問及,Bobby指戲份多少問題要問監製或編劇,他只是跟劇本去做,或者當時現場飛紙仔,演變成之後出來製成品,他說:「我都睇電視先知,觀眾眼睛係雪亮,咁佢哋要睇啲乜嘢,咁佢梗係想講,好彩係話想睇我哋多啲,如果話唔想睇我哋咁就死啦。」馬神在旁笑說:「點解仲有你哋嘅。」馬神則避談戲份少一事,只表示很久沒有演反派角色,還要對手是Bobby。兩人也直呼對手戲太少不夠喉,兩大視帝正面交鋒應該可以早點有對手戲,等到第21集起才有實在太遲。

準備好收視福將除牌

對於網民鬧爆監製指Bobby戲份少,影響「收視福將」美譽,Bobby二話不說:「所以拍埋呢套我可以甩咗呢個名,你諗個牽連幾大,原來我戲份少啲,『收視福將』稱號都甩埋。」他坦言背負這個稱號也感到很大壓力同包袱大,他說:「唔係次次套套都收視高㗎嘛,有時天時地利人和,個片幾時出呀,或者啲內容點樣呀,好多嘢加埋,我都『收視福將』咗廿幾年喇,應該不如你嚟。」馬神聞言立即婉拒︰「唔敢當。」

陳瀅面對被指戲份過多,她表示收到劇本時,已經知道所演角色是串連所有故事,透過這角色向觀眾交代,她說:「我本身都係馬神同Bobby fans,吓又見唔到呀,都會覺得唔開心。」至於演技被網民指不太自然,陳瀅表示每次演出都要求自己有進步,不要給人感覺停滯不前,而今次角色是以往未做過的臥底,希望結局篇時觀眾會改觀。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner