add名人時尚|唐英年胞妹唐英敏罕有受訪 出新品牌搞NFT 「因為我貪玩」

更新時間 (HKT): 2021.05.18 02:00

前政務司司長唐英年高調從政,他胞妹、62歲的唐英敏(Mai)則繼承家族紡織生意,絕對低調,除了早年現身上市公司答問大會,極少出鏡。唐英敏早前罕有接受蘋果訪問,友善興奮地介紹她的新作:以NFT(Non-Fungible Token非同質化代幣)打頭炮的生活家品牌子MoScRYPTO。

近年加密貨幣非常熾熱,NFT市場令數碼藝術品、音訊檔案等有價有市,發展在過去幾個月核爆式增長。唐英敏同樣睇中NFT市場熱度及潛力,她一身casual的Polo shirt、卡其褲,抱住愛犬Calvin在銅鑼灣受訪時,身上並非其揸fit 20幾年的美國高檔cashmere女裝品牌TSE,「其實我最初係想做TSE Home and lifestyle products 先,諗咗好耐,9個月左右,都諗唔到點樣跳出呢個框架。」TSE星級捧場客包括:美國第一夫人、拜登太太Jill Biden、Gwyneth Paltrow等,由於始終有形像規限,故她最終決定另出一個新品牌,三個月前,將覺得好玩、有潛力又大熱的NFT元素加入去,結合新興的數碼加密藝術及實體世界,以及家族紡織生意合而為一。

品牌頭炮就以她愛犬Calvin做主角,先製成三幅NFT藝術,在交易平台以0.5粒以太幣定價,再將三幅作品做回實體的商品:cashmere咕𠱸、頭罩、毛毯等。「你響出面可以買好多NFT,做成點都得,咁樣就好好玩,因為我又鐘意貪玩,所以就咁開始。NFT對我嚟講,係一個designer、一個creator,我就拎佢做inspiration,去做一啲真嘅products,將digital去返 physical嘅一件事,我諗我哋係第一個。佳士得早前拍賣一組NFT頭像以破紀錄逾1億港元成交,連ebay今個月亦開放NFT交易,她坦言睇好NFT市場,亦已入手一批加密貨幣準備買NFT,但相信市場會先亂一陣子,故不會胡亂炒買太貴的作品。「NFT個價值就係響original度,同埋你完全可以認証,因為你無個簽名,無個Blockchain 嘅code響度,你就係worthless。」

唐英敏對新生意想法多多,向來低調的她來自上世紀百億富豪家族、「紡織大王」唐翔千。唐翔千育有三子一女,分別是唐英年、唐聖年、唐英敏和唐慶年。唐英敏跟隨爸爸指示,幾十年來在中港美三地不停飛,處理家族生意,「其實呢,我讀書就讀生物科技,讀完書就搵唔到嘢做,咁就去咗美國讀咗個MBA,留響紐約做咗五年auditing,咁我嗲哋就話,你橫掂響美國,就去TSE幫手啦,咁我就搬咗去LA,做咗十幾年。」其後因家族發展內地電子市場,她奉命回港幫手,「跟住我嗲哋話,年紀大喇,你做返TSE啦, 我話『哦』 ,咪做囉,所以我係一個咩都做嘅人。其實我都鍾意做衫多啲嘅,嗰啲電路板、光學儀器,我學都有排學。」直到2019年深圳的清溢光電上市,她可重新聚焦在服裝品牌上。「我爸爸係一個好好嘅人,好體貼,好關心人,佢對我無乜太大要求,只係要我凡事要盡力。」TSE方面,她坦言面對疫情困局,美國亦未能全面解封,在LA的大本營會繼續做男裝,同步發展以recycle cashmere做的可持續發展副線,以及在百貨店Neiman Marcus銷售。

唐翔千在2018年離世,唐家感情深厚,現時每逢周日家人均會聚集媽咪唐尤淑圻家中,吃晚飯聚天倫,她則負責焗甜品糕點,「我哋感情幾好㗎,我鍾意煮飯,中餐西餐日本餐都得,因為響美國住咗二十年,惟有自己煮飯,細佬每次都帶個鹹嘅餸,唔想同細佬爭,我就整一樣甜嘅。」至於大哥唐英年又怎看她的新作?唐英敏笑說:「佢冇理,咁細嘅生意,佢話,總之你唔好闖禍就得。」

「我留響香港,冇得走㗎喇,因為𠵱家四隻狗響度。」一聽口氣,就知道唐英敏是名副其實的狗奴,她家中有4隻小狗,包括:在SPCA領養的約克㹴、在大埔廠房收養回來的唐狗,以及唐英年太太送的松鼠狗Calvin、貴婦狗。新品牌第一個產品都以Calvin做主角,「因為佢最後生、最上鏡,我又好鍾意我隻狗,既然係咁,我就做咗佢先啦。」除了狗以外,她同樣亦有餵流浪貓,還在不同動保組織助養貓咪。

撰文:林妃

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner