上月最後演出 羅家英傷心失宗師 
粵劇大老倌尤聲普 與世長辭享年89歲

更新時間 (HKT): 2021.05.18 02:00

粵劇大老倌尤聲普昨早在聯合醫院離世,享年89歲,有行內人表示他在五日前中風入院,直至昨早突然呼吸困難,醫護人員即時給他吸氧氣,可惜作用不大,情況持續轉差,最後醫生為尤聲普搶救,但10分鐘後他便告不治離世。

尹飛燕發現消瘦

尤聲普上月24日曾在屯門大會堂演出《乾坤鏡》(五代同台版),料不到這是他最後一次上台演出,合演的尹飛燕昨日接受《蘋果》電話訪問,透露當時已發現對方消瘦,有傳聞指尤聲普心臟有事,尹飛燕說:「我又唔係好清楚,我從來唔問人呢啲嘢,但一齊做嘢時佢又冇話有病,但疫情關係好多場合排戲,佢都話『我唔出嚟喇』,只係演出先見。」她表示從對方身上獲益良多:「我出身後同佢相處都有50年,後來大家都跟聲哥(林家聲)埋班,見面機會就多咗,我係花旦,而佢以前做文武生,現在做丑生。」又指從未聽過對方有退休念頭,不過大家年紀大,不約而同會選擇一些較輕鬆的演出,只求過戲癮。

尤聲普在1971年與阮兆輝等組成香港實驗劇團,以新派方式推廣粵劇,兩人交情深厚。阮兆輝昨日接受《蘋果》訪問時表示︰「我係今朝聽到消息,唔係佢太太通知,係我哋搵人求證。」而阮兆輝兒子阮德鏘亦傷感地說:「我哋兩家人會一齊去旅行,知道佢離世時冇好辛苦,好安詳。」

蓋鳴暉多謝提攜

蓋鳴暉昨日接受訪問,指當年入行曾得到尤聲普提攜:「去年我都有去睇佢演出,戲行又少咗一位資深又有內涵嘅前輩,希望佢一路好走。」

羅家英亦在社交平台發文悼念好友:「香港殿堂級粵劇老倌少了一個宗師,很捨不得,很意外,他一向身體很好,忽然的辭世,或許是一個很舒服的離開,但是我們很傷心,我17歲與他演出,到現在60多年,做了一世的戲,在舞台上,我們很合拍,教了我很多東西。」

尤聲普前年與尹飛燕演出《明末遺恨》時,還被讚魄力十足,當時他說︰「都幾難做到好似我咁,我已經差不多90歲,仲差三年,即是87歲,倒轉都78歲啦,永不言休,做到自己唔做為止,我諗我都係喺台口同觀眾講拜拜。」他曾透露為了保持體魄及狀態,堅持每日半跑半行一小時作養生之道。

娛聞樂陪你走遍全球追星,即Like「娛果」FB 專頁!
BannerBanner