七小福觔斗王︱元華專做奸角拍星爺戲唔識笑 打足60年全身五勞七傷

更新時間 (HKT): 2021.05.18 00:30

今年68歲的元華,入行至今近60年,當年面容瘦削、長着一對小眼睛、留有兩撇招牌「八字鬚」的他,在電影中所演的角色,幾乎清一色是武藝高強的Big Boss。奸角、歹角在電影中通常沒有好下場,可是,現實中的元華,捱過當龍虎武師的鍛煉、跨過演藝事業高低潮的變遷,如今踏入退休之齡,元華早已放下腳步、享受慢活人生的豐盛成果。

好人難做

元華日前接受《蘋果》訪問時,幾乎每說一句,都會夾着幾聲嘹亮笑聲,當年「神憎鬼厭」奸角表情早已不復再,換來是一副慈祥老人的可親面容。對於初出道每部戲都做反派,元華說:「咁每套戲裏面都需要壞人嘅角色,但好人名額有限,咁我咪做奸囉,你冇聽過咩,好人難做嘛!我都要同成龍、大哥(洪金寶)佢哋有返咁上下半斤八兩,先有得打喎。」元華試過在電影《飛龍猛將》,自己一個和洪金寶、元彪、成龍一打三,師兄弟個個打出名堂,自己整天飾演反角會否覺得委屈?元華淡然地說:「做人咁辛苦做乜,有咩好頹喪,你有你做之嘛,同啲師兄弟一齊拍戲已經好開心,尤其大家拍戲啲動作夾開好容易配合到。其實做演員做忠也好,做奸亦冇所謂,最重要係演到個角色精髓。」

阿仔係星爺忠實fans

在元華的演藝生涯中,2005年星爺電影《功夫》為他迎來事業上的第二春,戲中他飾演的包租公,鹹濕、猥瑣但又武功高強,結果元華憑此戲一次過捧走香港金像獎及金紫荊獎最佳男配角。算是演到了配角的極致。元華在戲中除了打得亦需搭配演技,須知道星爺素聞對拍檔要求高,鬧起人上來「唔係人咁品」,但元華面對星爺卻能做到處之泰然。「同星爺拍《功夫》前已經拍過《龍的傳人》、《情聖》同《新精武門》,所以再合作都知佢要求。佢嗰時見返我第一句就話『喂,你肥咗喎,要減減佢喇!』套戲元秋要肥我要瘦,其實都係咁做啫,又唔覺佢特別惡。」

對於星爺的無厘頭演繹,華哥坦言最重要是觀眾接受。「我哋做演員嘅都係跟住導演要求去做,觀眾接受佢(星爺)嗰套就得,就好似我個仔,成日都睇佢啲戲,每套都睇好多次,你哋話好笑咪好笑囉!不過其實我演嗰陣,係唔覺得好笑,有師兄話如果你自己做戲,自己喺度笑嘅,咁就唔叫好笑,因為你笑係冇用,要觀眾笑先得嘅!」元華當年上台拎男配角獎心情激動,對於遲來的獎項,他說:「冇話太遲,個獎係一份認同,唔係咁易攞到,有好多人冇獎攞都係咁啦!」

每朝瞓醒痛到捵床捵席

雖然面前的元華腰板挺直,聲線洪亮,但打了大半生的他,身體近年已出現不少毛病。「打咗幾十年,膊頭、頸、膝頭、手腕、腳腕⋯⋯幾乎講得出旳關節位都會痛,尤其坐得耐,有時食嘢都有問題,每朝瞓醒都會痛到喺張床捵嚟捵去,要鬆吓啲筋骨先起到身。之前都有睇過物理治療,又試過針灸,但都冇乜用,不如搵樽藥酒捽吓好過。」元華表示在《功夫》後,有次練習翻觔斗動作,結果失去重心整塊面擦落地,這時,元華意識到,自己的武打生涯是時候「夠鐘」了。「而家碌吓地就得,年紀大,再整親就手尾長喇!」

筋骨勞損以致痛楚伴隨一生,不過元華坦言沒有入錯行,能夠將一技之長變成終身事業是一件樂事。他和老婆結婚30多年,兩公婆經常被影到一齊出街撐枱腳,形影不離。事實上,早已屆退休年齡的元華,自從兒子定居加拿大並生了小朋友後,元華夫婦一年總會有幾個月飛往加拿大幫手湊孫。弄孫為樂,拍戲拍劇純為興趣,可算是元華現時的生活寫照。

採訪:王梓嫚

攝影:沈健程

攝錄:馮嘉銘

地點: Chilli Lime

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner