吳若希細佬怕連累家姐 承諾就算冇出息都要努力做人

更新時間 (HKT): 2021.05.19 23:48

一向「惹火」的吳若希,早前因被農莊將照片放到官方平台,而直接留言叫對方刪相,被網民指她「好大官威」。吳若希對住其他人就「一撻即着」,對住親細佬亦一樣,但今次不是撻着鬧交掣,而是眼淚掣。

拍拖次數被篤爆

吳若希YouTube頻道今次請來與她年齡相差12歲的細佬Carson做嘉賓,兩姊弟玩「互相了解」問答遊戲時,當問到細佬拍拖次數,吳若希即問:「你想我講真話定講假話?」Carson即時顯得非常尷尬,但吳若希再問:「認真拍拖嘅?但嗰啲puppy love算唔算?你想唔想我講?」Carson隨即話家姐拍過4至5次拖,而自己現時則第2次拍拖,誰知吳若希聽後即反問:「即係你之前嗰啲puppy love唔計嘅?」慘被揭穿的Carson只能以儍笑遮醜。

當2003年出世的Carson被問知不知道四大天王有誰人時,他因想不起張學友而被吳若希取笑,不過Carson就好醒地反擊,反問吳若希是否知道韓國女團BLACKPINK成員名字,但吳若希就只答得出Liza一個。之後兩人要用一個詞語形容對方,自認膚淺嘅吳若希以「靚仔」形容細佬,相反Carson就好認真地話:「對屋企人好好、對我好好、好愛我、好錫我。」

家人是死穴

Carson回想自己從小不是跟爸媽同住,雖然覺得孤單,但幸好當吳若希晚上返家後會同自己傾偈,令他覺得家中並非只得自己一個。吳若希這時亦變得感性地指家人對兩姊弟來說都是死穴,她又向細佬解釋當初生兒子「搏啜」Kylian時,就是因為希望自己的兩個小孩能有兄弟姊妹陪伴成長,她說:「當我未結婚未生小朋友時,當我有啲咩事,有個人喺側邊陪住你嗰個感覺已經好好。」而Carson表示在得知吳若希首次懷孕時,很擔心只剩下自己一人:「我係咪之後就一個人?我應該要更加獨立,我最驚嘅就係我做(咗)啲咩去影響你嘅生活。」Carson越講越激動:「無論我第二時冇乜出息,我都一定要努力去做好自己,唔好畀家姐擔心。」眼見細佬講到喊,吳若希發出了一聲怪叫後亦忍不住抹眼淚,雖然場面感動,不過因兩人都喊,搞到最後要結束錄影。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner