193率直性格成廣告新寵兒 堅持唔拍衞生巾廣告

更新時間 (HKT): 2021.05.19 21:10
(資料圖片/IG圖片)

組合ERROR成員193(郭嘉駿)的率直性格連經理人黃慧君(花姐)也夠膽得罪,一個月前以「佢哋係畀老嘢睇嘛」、「做好自己就有人睇,收視得幾百部電視機,我哋不嬲都唔理。」等幾句回應曾志偉指ViuTV較偏門說法,結果193被封為「三哥」和「三爺」,其 IG followers激增,已經超越人氣王姜濤。

人氣爆燈的193成為廣告界新寵兒,短短一個月內工作亦排滿時間表,昨晚推出第一首派台歌《睡到三點》,點擊率更在一夜升起YouTube熱門榜第2位,下周更接拍電影《假冒女團》。今日193趁工作的空檔,突然在IG開直播,一來想繼續宣傳自己首新歌,二來想測試在毫無預告下開直播,究竟會有多少人收看,結果44分鐘直播,一度超過9,000人觀看。

工作排滿 日睡2小時

直播中,fans最關心是193何時開賣特別為新歌MV而做的壽衣款睡衣,此事令193搲爆頭,不明大家為何會想買壽衣着,他說:「我係有計劃將我隻火柴人推出產品,然後呃晒大家啲錢,不過我近排真係好忙,等我有時間即刻搵人整。」他指近日工作忙過不停,每日只瞓得2、3小時,他說:「呢個係我最期待咁攰日子,因為我曾經試過兩個禮拜冇工開,所以而家係非常感恩,可以忙到爆。」

思想上嘅老嘢

新歌遲遲未能登上第一位,193不停催促大家幫手上網點擊欣賞,他解釋新歌是比較hip hop及indie風格,再加入auto-tune技術,對於有人批評他唱不到才靠科技調音,他又再坦率之神上身說:「入到錄音室係冇歌手唱唔到歌,慢慢遂隻tune都得。」其後193再向《蘋果》表示一向甚少看留言,他今次希望將另類風格歌曲帶給大家:「錄歌時,今次歌曲監製反而將我『啱音』部份tune歪,先可以變成機械音,呢啲唔係專業音樂人係唔會識,唔識就去研究,唔係亂批評。我都有keep住學唱歌,同埋呢首歌唔係sell唱功,我諗冇一首hip hop歌係sell唱功,我諗香港觀眾思想真係太守舊,我會稱呼為『思想上嘅老嘢』!不過都多謝佢哋嘅批評,如果有意思、畀到改進空間我,我絕對會接受,但如果惡意批評,我真係唔care。」他希望新歌成績好,之後可以說服公司給他製作第2首歌曲。

對於將與Anson Lo拍戲一事,193表示之前曾拍過電影《翻生爭霸戰》,今次是第2次拍戲,他感謝劇集《地產仔》導演徐梓耀找他客串,下星期會拍攝他的戲份,但自嘲是茄喱啡。提到現時在歌、影、視三棲發展,193說:「我不嬲都好想做一個全能藝人,唔係淨係一個搞笑藝人,我之前拍劇嘅時候,我都好認真去鑽研每個角色,我一直都有keep住學戲,希望大家都見到我進步,自己睇返之前嘅表現,每套劇都見到自己進步緊,我自問拍《無限斜棟有限公司》都算OK、唔差,可能今次又有一個新嘅進步機會,我想畀人知道我係一個演員,所以我一直keep住黑色頭髮,我冇再染髮,就係想畀大家知道,其實我都可以做正常嘢,我都可以做到演員。」

年底開talk騷

直播留言中被問到何時開talk騷,193指原定是6月舉行,但因為工作太忙,暫定延至年底才舉行。再被問會否開拍《花姐ERROR遊3》,193露出慘樣說:「我已經唔想再經歷食蟲食屎,希望可以開拍《ERROR自救TV2》或《ERROR自肥企画2》。」雖然隊友肥仔、何啟華和保錡已經先後向網民找數,唯獨未193表態,不過193兩度強調不會唱《ERROR自肥企画》主題曲,他說:「我絕對唔會唱,再唱就冇新意,不如大家聽我首新歌,之後仲有合唱歌。」早前被網民力推擔任米線代言人,193感激大家助攻他接拍廣告,但呼籲不要再推薦他接拍衞生巾廣告,皆因他收到同事通知有好多衞生巾商戶洽談合作,他先旨聲明不接拍衞生巾、避孕藥及避孕丸廣告。

日前被造型師在IG爆料指他早前接受訪問時忍不住落淚,193透露當時提及fans,他說:「每次講fans,我就會感動,有一班人好無條件付出同支持我,我講講吓有啲感觸,所以就喊。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner