鍾培生答允合拍遊戲節目 「自肥」效應林作癲到除褲都得

更新時間 (HKT): 2021.05.19 16:08

林作與鍾培生由抽水事件演變成9月舉行的百萬拳賽「林鍾一戰」,花生指數甚高,早前林作於九龍灣首次出戰拳賽,鍾培生突然踩場並以支持「女友」來形容林作,雖然賽事林作最終輸了,不過他自言讓賽,並有信心擊敗鍾培生。

林作跟鍾培生繼續招積,二人的「牙骹戰」更不時散出濃烈火藥味,看似勢不兩立,但林作與鍾培生將合體為網台17LIVE拍攝節目《鍾林大戰》,共4輯的節目將以玩遊戲為主。

《蘋果》昨日致電林作求證,他確認有其事:「呢件事幾好笑,原本我前公司經理人轉咗去網台做嘢,佢邀請咗我去做直播,我盛情難卻就去做,點知佢哋覺得我哋單嘢有睇頭想做多啲宣傳,for 佢哋、for我哋都想宣傳吓,佢就走去同鍾培生傾,點知又傾到,我就冇所謂嘅,當係賽前嘅前哨戰,會係娛樂形式多啲。」林作透露節目將於月底開始拍攝,當中包括辯論和玩遊戲,他說:「我梗係想賽前先贏一仗,未上擂台已經嚇死咗佢啦!」問到最近《ERROR自肥企画》hit爆,若要像「自肥」中瘋狂的遊戲玩法,他可接受?林作說:「我梗係接受到啦!我巴不得係咁樣,我底線係除褲同露毛,咁先有宣傳效果同多啲人去睇,但我懷疑鍾生對節目要求都頗多,佢未必肯。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner