柯煒林食烚菜減廿磅演露宿者 每啖飯體會漂泊辛酸

更新時間 (HKT): 2021.05.20 20:24

蔡思韵、朱栢康和柯煒林有份主演的電影《濁水漂流》,將於下月3日上映,該片講述露宿者的故事。三人早前在西環接受訪問,朱栢康和柯煒林在片中飾演染有毒癮的露宿者,拍攝前他們需要減肥,朱栢康說:「之前拍咗兩部打戲,用咗一年半時間上磅練大隻,後來接咗《濁水漂流》,我只有個幾禮拜時間減20磅,唔食嘢去跑山,跑完有少少餓咪食蘋果,去到禮拜尾,我跑山嘅時候爭啲碌落山,即刻去返平地跑;因為之前練到好大隻,肌肉消唔晒,所以你哋睇到我唔係好瘦。」當時十分擔心自己的身形未符合角色,但當朱栢康到深水埗考察時,發現原來都有身形大隻、有毒癮的露宿者,他笑言當刻安樂了。

柯煒林由160磅減至140磅,每次當劇組開飯,他只能食白烚菜:「有場戲講露宿者排隊等拎飯,我拍得好開心,係咁食,係咁扒飯。」朱栢康笑說:「cut咗機,我仲攞埋隔籬嗰盒飯。」蔡思韵在片中飾演幫助露宿者的社工,面對眼前的無力感,心情變得沉重,她說:「本身有場喊戲,一鏡到底,但導演cut咗,我諗導演係想留白,我都理解。」

拍攝這部電影後,令演員們對露宿者的睇法亦有所改變,認為任何人都要給予尊重,朱栢康說:「露宿者遍佈喺我哋生活周邊,其實我本身冇乜點理,一種漠不關心嘅狀況,但拍完多咗體會,加上自己實地考察過,令我思考到任何人都應該值得尊重,應該值得關懷,哪怕佢有任何問題都好,每個人喺世界上,都有佢哋一啲佢哋解決唔到,或者佢哋沉淪嘅問題,如果喺呢個大前題下,每個人都值得被尊重。」問到朱栢康在深水埗考察時,有否被露宿者趕走?他說:「我只係遠遠咁觀察,當佢哋『上電』嘅時候,我當然好想睇啦,但我喺一個遠距離,不過有幾個望住我,然後我同經理人扮傾偈。」

柯煒林力斥有關部門沒有人情味,他說:「公園啲凳加咗扶手,你會思考點解有呢個扶手,球場大約夜晚11點會閂閘,其實係為咗趕絕露宿者唔好喺呢個地方逗留,我覺得冇人情味,試過有幾晚好凍,我喺facebook見到深水埗隧道要洗街,所有棉被、床褥濕咗就好大劑,嗰陣有啲同學做緊社工,或者讀緊呢科,佢哋就過去帶露宿者去一個地方暫避先,呢個都係講緊人情味;每個人去到唔同環境,都有佢哋嘅因由,冇必要吖,香港容納唔到咩?我睇過一段報道,有啲露宿者喺朝早7點前會帶埋自己啲嘢走,佢哋都會怕自己打擾到人。」

蔡思韵透露中學年代,在油麻地果欄對面的天橋下,做義工派飯盒給露宿者,「好深刻係我可以同佢哋傾偈,其實佢哋有啲係難民,留咗喺香港,又冇家人,變成流浪,其實佢哋只係一個普通人,只不過佢哋有佢哋嘅難處,同我哋嘅生活唔同,當我理解到佢哋嘅難處,我會同理佢哋,亦好幫助到我今次飾演社工呢個角色。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner