【娛樂人物】193 人生太跳

更新時間 (HKT): 2021.05.21 02:00

無綫早前找曾志偉救亡,卻越救越亡,ViuTV的MIRROR演唱會爆紅,搞笑組合ERROR也順利入屋,其中花名為193的成員郭嘉駿因寸爆無綫「收視點得嗰幾百部電視機」,直線抽擊曾志偉,直率敢言獲封娛樂圈清泉,Ig followers急增並已超越萬人迷姜濤。於鏡頭前予人囂張寸嘴的193,日前分別接受《蘋果》及《壹週刊》訪問,態度卻正經謙虛,他坦言鏡頭前與鏡頭後的自己不一樣,提到有fans支持時更感動落淚,又指自己讀完文科讀理科、讀完心理學又走去做時裝及藝人,直言「人生好跳」!

成為大紅人的193,好艱難才能「攝期」做到專訪,他鏡頭後難掩疲態,但埋位後即好醒神,態度卻絕非驕傲自大,相反表現有少許自卑。被問到唔怕得罪無綫,是戲還是真心話?193認真地說:「我係好鍾意講真話,唔理人嬲唔嬲都好,入ERROR時有傾過,大家都覺得我係應該要黐線啲去嘩眾取寵,目的要畀人一個記憶點。但其實我係一個好認真、唔係好鍾意講嘢嘅人,冇人信啦,當然。純屬所有嘢係訓練出嚟,為勢所迫囉。」193攤開雙手,表情帶點無奈。他直言騎呢形象已不能回頭,「我簽ViuTV嘅時候,只係話做藝員,點知入ERROR之後一去不返,已經冇人覺得我可以做正經嘢。你諗吓我得罪咗隔籬公司,仲唔去求金生(金廣誠)、魯生(魯庭暉)續多我二十年約咩。」

自製強心針:「你知我咩料」

《全民造星》他40強止步,但受到黃慧君(花姐)賞識,與肥仔、阿Dee及保錡組成騎呢男子組合ERROR,他曾經問過花姐為何選擇自己,「可以讚自己?花姐咪話我都聰明之類,識處理同點做好件事,而唔係鏡頭前懶洋洋、好廢,嗰啲係形象。」193又自言是眾人之中最缺乏自信的一個:「入行前唔會無啦啦問人『你知我咩料』,係入行後要表現到好有自信,先用呢句說話去present到自己好犀利。其實《造星》個個識唱歌跳舞,初入行時對比其他人係冇自信。」193現時則默默努力,並指不需要講出來,「如果有一日有呢個成果大家就會睇到,唔需要成日同大家講我好努力做緊邊樣嘢,做緊乜乜乜,我成日見到啲咁嘅人,覺得好娘,呢行全部人都努力㗎啦!」

193童年時與父母及妹妹同住於黃埔花園,曾就讀Band 1中學,是南華籃球少年隊成員,之後畢業於英國班戈大學心理學系榮譽學士,又在當地讀時裝課程:「我人生好跳,喺香港讀文科、英國讀理科,讀完心理學返嚟又做時裝,無啦啦去咗做演員。其實有諗過讀教育心理學嘅碩士,但當時自己任性,突然好鍾意fashion,之後就返唔到轉頭,屋企人冇講啲乜,但我知佢哋係support,開心就得。」

自細恨入行 扮病考藝員

其實193自小已經想入行,中學時想過參加《Yes!》校草選舉,但最終反而隔籬班有同學參加,然後攞到冠軍。193畢業回港先後在連卡佛和I.T做過時裝買手,其間更曾投考無綫藝訓班。 「我為咗慳假期唔請假,我扮病,上晝返咗兩個鐘扮到面青口唇白,上司直情趕我走,然後我即刻去咗將軍澳,不過最終冇被取錄。」參加《造星》時,193覺得自己28歲已不再年輕,如果不嘗試,一世都不會再試,「可能去到五、六十歲時,會同返自己個仔講,好後悔當時冇參加。」

簽約ViuTV後,193曾經入不敷支,他透露曾狂買衫花費不少,之後索性買入一些外國品牌,然後在香港及內地轉售賺錢。現今事業有突破,廣告不絕,193坦言想買樓,「少爺占經常叫我一定要買樓,已經提過幾次,佢喺呢方面係一個榜樣,所以呢個係我嘅目標。」不過193指為讓自己有更大發揮,亦願意把錢投資做project,他早前就獲花姐御准,攞正牌私下同吳業坤合作錄歌,稍後將放上YouTube供大家欣賞,並不涉及公司發行。

撰文:嵐山

攝影:陳慧安

化妝:Manyi @Annie G. Chan Makeup Centre

髮型:Denny Ku @Chic Private i Salon

服裝提供:Issey Miyake(outfit) + HOAX(shoes)

娛聞樂陪你走遍全球追星,即Like「娛果」FB 專頁!
BannerBanner