《ERROR自肥企画》被推「綜藝第一神作」 格仔Mike導親解女朋友之謎

更新時間 (HKT): 2021.05.22 16:59

《ERROR自肥企画》全篇完,「自肥迷」難免有點失落感,但更令人難以接受,竟然是193(郭嘉駿)在節目中爆格仔Mike導(劉諾衡)有女朋友,即令一班「格仔餅」(粉絲)心情跌落谷底,在討論區連環開post,指「劉諾衡mike bb被宣佈有女朋友哭喪區!!!」、「IFC 已現人龍」。

最後一集,格仔Mike導透露節目嚴重超資,他承擔責任,硬食一記全力的死亡行星,不幸被擊中下體。現場一片歡呼聲,193奸笑說:「中咗佢呀,今日佢女朋友一定讚佢呀,大咗,又壯咗!」Mike導今年只有27歲,可說年輕有為,加上經常在節目中「自肥」出鏡,狂騷六嚿腹肌,早已吸納不少粉絲,其IG followers已衝破10萬大關。當得知Mike導已有女朋友,大批「格仔餅」表示要哭喪,非常葡萄:「晚晚OT到5、6點,條女都擁有唔到Mike導」、「Mike b之後放假會將成個人交畀佢條女,X越講越Sad」、「摸住佢啲腹肌,恥笑我哋」、「我要圍爐,我個心好痛」、「雖然佢咁X正,一定大把女排住隊畀佢揀,但知道咗都仲係好傷心呀」等等,但亦有人送上祝福:「要幸福呀!Mike嫂見post勿驚 #adore #Respect!」有網民試圖「起底」,指Mike女朋友就是《花姐ERROR遊2》的巨型海報上攬住Mike的女仔,隨即有人更正:「嗰個係Julia嚟㗎喎(日本AV女優)」。

承認有女朋友

《蘋果》今日致電Mike導,對於粉絲的熱情亦有點不知所措,他有點緊張地說:「我諗吓點答先。」他大方承認自己有一位拍拖一段時間的女朋友,但希望將感情事低調,問到女友是否同屬運動型?他說:「唔係啦,佢同我好唔同。一凹一凸?係。」會否擔心粉絲太瘋狂,特別保護女朋友避免曝光?他說:「正常處理啦,冇話特別驚嘅。」對於193忘記遮格仔導演個樣後,今次再度爆料,他即忍不住開口:「193呢條友,又話感情事唔回應,佢淨係回應人哋嘅感情問題,真係好兄弟!」記者趁機問193是否與「女版Dee哥」陳海寧拍拖?Mike則說:「咁我就感情問題唔回應啦!」

網民推「綜藝第一神作」

《ERROR自肥企画》每集都用心製作,首尾呼應,有網民更推舉成為香港電視史上「綜藝第一神作」,Mike說:「噚日嗰樣係同個opening一樣,係啲我想拍好耐嘅嘢嚟,因為呢個節目形式比較闊,令我同埋團隊都可以喺呢個節目試到呢樣嘢,我覺得呢樣嘢係難做嘅,即使我哋係致敬嘢啦,攞咗人哋嘅主題,但入面嘅嘢其實係我哋,我覺得係用致敬做咗第二啲嘢出嚟。」問到會否考慮拍劇?他自爆曾遭拒絕:「絕對有,同一個班底。老實講,拍劇都係我好想挑戰嘅一個類別,未試過,有同老細sell過,但sell唔掂啦,好多原因。而今次自肥,係有少少利用咗肥仔,去滿足自己嘅,可能老細睇完會唔鍾意啦,哈哈。」

暫未考慮轉幕前

不少人都希望他有更多的幕前演出,但Mike表示暫時不會考慮轉做演員:「暫時絕對冇考慮,因為暫時幾享受,幕前同幕後係好唔同,可以控制到嘅嘢係多好多。加人工?如果有都冇咁快,唔知道住嘅,但知道疫情,一言難盡啦。」而他早前主唱的《ERROR自肥企画》主題曲《無制限OT編集?の行動綱領》在大結局前,已累積達150萬點擊率,他承諾會找數派驚喜,預計6月中至6月底完成。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner