P1X3L追夢男兒自由闖蕩 享受壓力向MIRROR偷師

更新時間 (HKT): 2021.05.22 06:00

男子跳唱組合P1X3L(讀音:Pixel)由《全民造星II》冠軍吳啟洋(Phoebus)、參賽者歐鎮灝(George)與葉振弘(Marco)組成,去年有幸獲環球唱片賞識簽約,成軍後他們繼續追夢,繼《Braceless》後最近他們正籌備另一新歌。三子日前到新蒲崗排舞,George說:「公司今次搵咗個外國嘅producer,係專門出產J-pop同K-pop嘅,今次好好彩有呢首歌做我哋第二首單曲,呢首歌亦都係跳舞唱歌。我自己一路都好鍾意K-pop,今次能夠有大家一齊back up住我組成P1X3L,係好幸福嘅事,三個人一齊上台有三份信心,係好正嘅事。」

Phoebus指新歌的主題是「自由」,三位年輕人深感自由可貴,Phoebus說:「尤其係我哋呢個年紀、呢個階層,係好需要自由,好似以前讀大學,讀書唔係自己最鍾意嘅嘢,去到而家可以做啲自己鍾意做嘅嘢,就真正感受到自由。」George則說:「自由係好緊要嘅,身處喺呢個環境當中,有自己空間先可以發揮出自己嘅創意。」Marco說:「好幸運我屋企都畀好多空間我,所以比較自由,做自己鍾意做嘅嘢,真係正!」身旁兩位隊友不禁爆Marco是有錢仔,故特別多自由。

現年24歲的Phoebus是《造星II》冠軍,22歲的George則是第四名,而Marco也是同屆《造星》,三子有着不同風格,各有強項,Phoebus說:「我出道唔係好耐,可能得幾個月時間,但我好享受每一分每一秒,都會有辛苦嘅時候,但呢啲回憶全部都係好開心。以前讀書嘅壓力同而家好唔同,而家嘅壓力我係好享受。」雖然現時P1X3L的名字還未太多人認識,但他們一直努力,辛苦之餘也樂在其中,Marco說:「呢個組合畀我係得來不易嘅感覺,係有壓力嘅,自己想更加進步,但好享受呢個舞台。」

三子年紀輕輕,謙虛有禮,在MIRROR演唱會上主動向鄭裕玲Do姐打招呼,令Do姐印象深刻,還在電台節目中開名大讚,他們笑言很榮幸,並希望有機會上Do姐節目分享。提到師兄們MIRROR與ERROR的成功,三子會否感到壓力?Phoebus參賽《造星II》時一直被姜濤看好,他說:「唔會係壓力,我覺得香港有MIRROR係好好嘅一件事!我哋睇MIRROR演唱會,都變咗小粉絲咁,多咗好多人留意香港嘅音樂,可能會因為見到男子組合嘅佢哋就會諗起我哋P1X3L,所以係好好嘅一件事。姜濤身上都有好多畀我哋學習嘅地方,例如處事、態度同舞台上嘅一啲諗法,都值得學習。」而他們看到MIRROR的成功也替他們開心,他們更不時偷師,Marco說:「佢哋嘅實力真係好強,會教到我哋好多嘢。」而George則認為師兄們給他很大的原動力和推動力:「我睇完Anson Lo喺演唱會唱完《EGO》,真係覺得佢成個人唔同晒,感受到嗰份努力,嗰刻真係好感動,所以我覺得我哋三個係應該學MIRROR唔同嘅嘢。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner