大陸土炮英雄片《CHINA CAPTAIN》集各路人物亂打一粒鐘 網民捱2分鐘投降

更新時間 (HKT): 2021.05.23 22:57
相信都唔會有人諗到,包大人個月亮原來可以出死光射人!(網絡圖片)

一直以來英雄片都有非常龐大市場,早前DC嘅導演版《正義聯盟》,更係一上架就搞到播映嘅網站死機。唔知係咪眼見外國英雄片咁受歡迎,大陸最近都推出咗套名為《孤膽行動》(又名:中國隊長之中隊崛起/CHINA CAPTAIN)網絡電影,戲裏面除咗有「中國隊長」外,仲有濟公、關羽、東方不敗、孫悟空、楊過等經典角色或傳奇人物,真係睇到人嘆為觀止!

炮彈見小新貼紙

嗱,呢套由大陸演員李泰延、鄭曉甫同杜喬等主演、包含大陸唔同年代、唔同神話人物嘅電影,劇情大概係講述被熱捧成偶像嘅中國隊長俾人打敗後,點樣企返起身打敗敵人。先唔討論劇情老唔老套,但長達一個鐘嘅電影,一開始就用咗漫畫交代故事,非常有外國feel,而劇情講到中國隊長同一堆士兵打交嗰陣,坦克突然向隊長發炮,本來都冇乜事,但點估到炮彈上竟然貼咗蠟筆小新、Hello Kitty同埋比卡超嘅貼紙?!

另外,到尾段中國隊長打大佬時更有濟公、豬八戒、關羽、包青天、東方不敗、孫悟空及楊過等齊齊現身幫拖,而最爆嘅係包大人額頭上嘅月亮原來係可以出死光射人,真係睇到人熱血沸騰!

出場人物如同「聯合國」

咁都未夠,呢套戲唔止將大陸嘅「自己人」炒埋一碟,仲將唔同國家嘅動漫、英雄人物都炒埋一齊,就好似戲中疑似係小丑(Joker)化身嘅大奸角咁,就有一個貌似《街頭霸王》入面嘅阿龍做跟班。除此之外,大奸角仲有《海賊王》(ONE PIECE)嘅路飛、《蝙蝠俠》嘅班恩(Bane)、《美少女戰士》嘅月野兔、《呪術廻戰》嘅五條悟等做手下,真係極為多元化!

《孤膽行動》喺網絡推出後,有大陸電影網站自high地認為漫威同DC都應該要「甘拜下風」,但一眾大陸網民睇完都一面倒喺「豆瓣」留言狂踩,大部份網民都話冇辦法睇晒套戲,更有人直接以「垃圾」做評價,又反問:「導演你知道自己在拍甚麼嗎?編劇你知道自己在寫甚麼嗎?演員你知道自己在演甚麼嗎?」雖然被網民一致劣評,但在獨家播放的騰訊網中,該片卻有7.6分,但有網民睇完就留言指在騰訊內畀唔好評語就被秒删,所以決定「轉場」留言。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner