【首尾呼應】電視對抗零碎娛樂

更新時間 (HKT): 2021.05.23 02:00

ViuTV《ERROR自肥企画》前晚播出最後一集,ERROR四位成員再次扮演動畫《新世紀福音戰士》的人物,與首集出現過的「Double S」沈殷怡、陳欣妍和P1X3L演出一段約八分鐘的短劇,對白籲港人繼續睇電視外,更是充滿時事、哲學性,獲網民激讚。

【電視?為甚麼?】

Dee:呢度,係邊度啊?節目係咪已經完咗喇?

肥仔:係娛樂完成,但係播映時段未終結嘅世界。

(Dee拿起電話)

肥仔:只要你𠵱家一拎起電話,呢個電視播出嘅所有嘢,就會了無意義,係咪要咁做?

【ERROR、是甚麼】

193:ERROR係香港跳唱團體,成員有梁業、何啟華、郭嘉駿、吳保錡。

Dee:呢幾個人睇落有啲陌生,就算我喺入面都有咁嘅感覺。點解嘅?

肥仔:呢啲片段,缺乏前文後理。

193:但好多人都會自行整理出立體嘅人格,投射落去。鏡頭面前,有時我哋只係一組剪接出嚟嘅符號。

肥仔:ERROR都係符號,係一種意義嘅載體。蛇蟲鼠蟻屎尿屁,整蠱挑戰大懲罰,都係一種意義嘅載體。

Dee:係乜意義呀?

保錡:係娛樂。

【娛樂、何故】

肥仔:娛樂嘅目的同意義,單純就係娛樂本身,係「amusement」,係陪伴、係安慰。

保錡:呢個係艱難嘅時代。

肥仔:ERROR隱喻緊,世界其實唔係有咁多掣肘。

Dee:但現實太多掣肘。

肥仔:隱喻緊世界其實唔係有咁多痛楚。

Dee:但每日都痛不欲生!

193:最痛嘅時候,都可以不按牌理咁歡笑,係ERROR發放嘅意義,係呢時代大家都需要嘅能力。

Dee:我做網絡紅人都可以娛樂大家㗎!我唔需要ERROR、唔需要電視!

【電視、為甚麼】

Dee:媒體每一日都有報道重要嘅事情呀!個世界仲係好有意義㗎!

193:全部缺乏前文後理,了無意義,係片段化,氾濫、無用嘅麻醉藥。

肥仔:片段化嘅零碎娛樂令大家習慣覺得,任何意念可以喺幾分鐘,或者幾十秒內表達。

保錡:慢慢所有人都唔能夠再有專注力,承載重大意念。

肥仔:雖然娛樂本身係電視存在嘅目的,但𠵱家反而變成對抗零碎娛樂嘅武器。

193:Viu嘅戰鬥、ERROR嘅戰鬥,係用節目凝聚,同補完專注力。

【大家都去了哪裏】

沈殷怡:唔好逃避你見到嘅嘢,即使有幾咁無力,都要張開眼睛活着。

陳欣妍:唔好俾戰鬥既定嘅符號所規限,每日自肥,總會得到力量!要耐心靜候!

Marco:要戰勝荒謬,首先要接受荒謬嘅必然性。

George:文明總會勝利,係信念!

Phoebus:相信一種價值,因為價值係由我哋主觀去定義。只要你相信,佢永遠都會存在。

Dee:越嚟越多唔識嘅人出現咗呀!

肥仔:佢哋全部都唔係坐以待斃嘅人。

保錡:就算你唔完美。

Marco:就算有人漠視你!

Phoebus:就算所有事都唔順利,都要記住自己能夠貢獻到嘅嘢,唔好否定你當初相信嘅價值。

Dee:唔好逃避!

沈殷怡:每次懷疑嘅時候都問一次自己,點解會喺度,喺度又係做乜嘢。

陳欣妍:如果未搵到答案,咁就再試多一次,唔好停止嘗試。

Dee:我明喇!

Dee:ERROR並唔係唯一戰鬥緊嘅人,只要一日仲留喺呢片土地上,每一個人都用自己嘅方式,喺自己嘅崗位戰鬥,一個人唔會成功,但如果每一個人都盡力嘅話,每一個人都盡力嘅話……

字幕:終結(以有限)開始(製無限)

娛聞樂陪你走遍全球追星,即Like「娛果」FB 專頁!
BannerBanner