Mike導低調護女友

更新時間 (HKT): 2021.05.23 02:00

前晚播出的節目《ERROR自肥企画》中,當ERROR成員郭嘉駿(193)看到Mike導(劉諾衡)因節目嚴重超支自罰「死亡行星」時,興奮地大爆Mike導有女朋友,193說:「今日佢女朋友一定讚佢呀,大咗,又壯咗!」事後,大批Mike導的粉絲「格仔餅」表示要「哭喪」,有人留言:「我要圍爐,我個心好痛」、「193點解唔呃多我一日?」及「要幸福呀!Mike嫂」等。Mike導昨日回應《蘋果》,大方承認有一位拍拖一段時間的女朋友,但希望將感情事低調,只說女友並非運動型。問到會否特別保護女朋友避免曝光?他說:「正常處理啦,冇話特別驚嘅。」

193自製Box Set派台

另外,193近日在《ERROR自肥企画》中「自肥」成功推出處男單曲《睡到三點》,YouTube上架三日已有逾60萬點擊,一度成為熱爆短片第一位,他前日在Ig留言︰「唔知星期一前有冇機會去到100萬」。乘勝追擊的193,日前將新歌派台,派台box set就貼上自己扮綾波麗嘜頭的日本蒸眼面膜,頓時成為商台DJ的熱捧新寵,其中少爺占留言:「呢條高佬我一定支持,等我寫錯佢啲嘢睇吓佢會唔會鬧我先!」又叫193努力賺錢買樓。而盧覓雪就拿着193新碟影相在Ig分享,DJ Oscar大讚box set絕對可以入選十大最佳派台宣傳品。而193近日更有機會拍電影《假冒女團》,與同是《造星》出身的陳葦璇合作。

娛聞樂陪你走遍全球追星,即Like「娛果」FB 專頁!
BannerBanner