余香凝剖腹產6.5磅B女 狂讚囡囡眼大大多眼眉毛好可愛

更新時間 (HKT): 2021.05.23 12:47

余香凝(Jennifer)今日在IG貼出BB相,宣佈誕女成功,英名叫Clare,體重6.5磅。Jennifer今個月15日才貼上孕照表示大直路,透露隨時生得,今日貼出BB相時,就透露至少剖腹生產了三日,正在餵母乳。

Jennifer貼出B女Clare的手仔相,以文字歡迎Clare加入家庭,她又讚BB肥肥白白、老公Tim照顧周到:「別人說小孩子不能讚,會讚壞但容許我在這裏讚一讚。要讚讚寶寶最後體重6.5磅,沒有浪費媽媽狂食長胎食物而胖了好多的心血,再讚讚寶寶非常配合,兩母女合作無間在大家的努力下,剖腹產第三天就上奶了。可以餵母乳餵到飽。也都要讚讚爸爸一直在身邊陪着媽媽,服侍媽媽,雙眼袋都出來了。寶寶,以後只要妳健康開心媽媽就滿足了,這世界沒有東西比妳更重要,愛妳。」

Jennifer之後透過電話分享喜悅,大讚Clare靚女:「BB似足爸爸,一個餅印,好靚!同埋佢已經有眼眉毛,自己擔心BB女似我少眉毛,結果似爸爸好多眼眉毛,眼睛好大,同埋佢都好乖好可愛。」她說一直擔心B女體重,兩個星期前作最後一次產檢時,亦只得5磅半,好彩出世時增磅:「自己真係好開心,一直以嚟食咁多長胎嘢真係冇白費到。」

她又說對「心肝寶貝」有好深體會:「佢每次喊我都好擔心,有次佢喊我都跟住喊,你會覺得係咪有咩唔舒服呢?」笑說已經做足心理準備擔心一世。她又說在醫院瞓得好少,幾乎每3個鐘起一次身,與女兒一齊嘗試母乳:「同佢一齊試,好快就已經成功咗。」她又再次讚女兒乖:「佢又冇成日喊,都係肚餓先喊。好多老人家話唔好讚,會讚壞,但我覺得都要嘉許一下佢。」

Jennifer去年底跟圈外男友陸政渡(Tim)結婚,在聖誕節宣佈陀B,對上一次出街活動是上月與《暖男爸爸》的其他成員入場睇鄭中基的中環海濱演唱會,當時Tim做跟得老公入場照顧,並透露已買了一大堆BB衫迎接新生命來臨。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner