中女唔易做丨趙學而入行30年首次見工 小儀「轉行」做農夫被彈多嘢講

更新時間 (HKT): 2021.05.24 12:17

當TVB仲係離地分享N年前老生常談嘅星爸星媽湊仔經,ViuTV又有新搞作,貼地咁講打工仔「中年危機」隨時要面對轉行,又或者全職媽媽重投職場等現況。《中女唔易做》今晚播出,承接着《中佬唔易做》話題,今次搵咗小儀、趙學而、楊思琦、康子妮、朱薰及杜如風,6位四十歲以上嘅女藝人,透過佢哋重投新行業,面對嘅各種困難,從中寄寓大家即使喺人生低潮,仍要自強渡過難關。

小儀與趙學而喺節目首兩集打頭陣,開始打工體驗,小儀做咗廿年DJ,坦言曾想過轉行,但內心總覺得好吃力,佢渴望可以體驗鄉郊生活,所以製作組提出叫佢嘗試做農夫,小儀去咗有機農場打工,跟有50年耕作經驗嘅卿姐學耕種,由於小儀習慣開咪、主持節目,一向多嘢講嘢,結果經常被卿姐叫佢「唔好講咁多嘢」,令小儀有所反思,做人原來都需要停下來,感受當下。

另一邊廂,趙學而入行30年從未見過工,對此佢感到非常疑惑「見工係咩嘢嚟」。趙學而於首集獲安排去電器舖應徵售貨員,面試人員指趙學而於求職表格填漏咗好多資料,問佢有冇帶相關資料及學歷證明,趙學而則反問面試人員有否上網查閱佢嘅個人履歷,對答頗為搞笑,結果趙學而首日被安排喺美容部返工,卻笑言自己係「電器殺手」。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner