旨呈嘆家庭複雜留港照顧同母異父哥哥 曾是叛逆少年被停學一年

更新時間 (HKT): 2021.05.24 00:30

有錢人的子女,總被套上「富二代」、「二世祖」的稱呼,背負住家族達10億身家的旨呈,難得打開心扉。他從「享樂團」成員,到參加《造星III》,繼而再被揭美容公司太子爺身份,從不介意由低做起,從不介意被標籤為二世祖,但在單親家庭中長大,總令他人生有點遺憾。旨呈曾是叛逆少年,與同母異父的4位兄妹相處,又要擔起上市公司繼承者,對旨呈的36年人生,可謂夠晒和味。

反叛期流連機舖

早前旨呈在九龍灣美容公司辦公室接受《蘋果》訪問,見他返到公司會親自招待熟客,又跟公司同事傾談工作。美容院的運作對他來說沒有難度,因他由做facial學起,至啪骨都識。回想當日在公司由低做起,原來他曾有段反叛歲月:「我13、14歲左右,我父母分開,嗰時好反叛,成日三五成群,覺得朋友先陪到我,因為返到屋企冇人,阿娘掛住做生意,父親又消失咗,屋企成日得我一個。」

曾裕與第二任丈夫鄺炳申於2000年離婚,對於父母分開,旨呈曾怪責過父母:「以前有,但而家冇。」當年他仍是中學生,有感沒有人理,便經常流連遊戲機中心,「嗰時成日去機舖,第二朝5、6點返屋企都冇人知。」他指媽媽不想他學壞,勒令他停學,跟媽媽返公司做boy,「我太曳,加上有嚴重哮喘,停咗一年學,嗰段時間喺公司乜都學,都係幾充實。」

同母異父兄妹

父母離婚,驟然變單親家庭,然而他的兄長和3位妹妹,跟他都是同母異父,他形容自己的家庭較複雜,「大家都知我娘親有唔同嘅丈夫,我有一位哥哥,佢有自閉症同輕度弱智,而3位妹妹都好細,所以娘親對我要求好高,因為我係繼承者,要繼承家族生意。」聽他說最細妹妹跟他相差年齡接近30年,換句話說妹妹當是女兒也可以,「佢哋太細,不過我個樣都呃得吓人,代溝?又唔會。而家娘親同3個妹移民去咗新加坡,疫情我哋都有年幾冇見。」談到哥哥,因為跟他一齊成長,兄弟關係相對較深厚,「哥哥得天獨厚,因為佢天生有自閉症,反而係最開心,佢唔需要諗太多嘢。我安排佢去庇護工場,每個月基本嘅伙食等等,同哥哥最冇計,而家留喺香港只係我同阿哥。」

談起父親,回想父母要離婚,他坦言有點難受,「爸爸好似係娛樂管家,佢負責安排我嘅活動,如童軍、潛水、行山,都係由佢訓練我。後來父母分開,媽媽又兼顧自己嘅事業同愛情,喺咁樣環境長大係孤獨,好似籠中鳥嘅感覺。我唔想俾孤單主宰,之後做音樂、慈善、義工,想活出自己。」

一看便知整容

最近旨呈為電影《我的印度男友》唱電影主題曲《印度咖喱因乜呢》,嘗試以印度腔的廣東話來唱歌,效果也不錯。至於旨呈的感情生活,仍是單身的他直言仍在等待中,「冇得強求,相處同磨合係好重要,等緊呢個目標出現。」身為太子爺,又經營美容院生意,難免有女仔投懷送抱,「就係冇,個個都以為我有。其實我係個重友輕色,唔煙唔酒冇夜生活。我成日對住成千個女仔(指公司),太多是非啦!我有句格言,核突啲講『唔好喺度食喺度屙』,標籤我『二世祖』冇所謂,但唔好標籤我嚟搵食,唔想俾人話『條友嚟溝女』,阿娘叫我唔好亂識女仔。」

作為美容界太子爺,可接受女朋友或將來另一半整過容呢?他感到如大難題,「死啦!自己做呢行,邊個整過、打過針,一望就睇得出,我自己都割雙眼皮,又冇話卻步,反而內心緊要過樣貌。」問他如遇到貪錢的女孩?他笑謂︰「唔好搵呢啲女仔,貪錢我都驚㗎,因為我冇錢,冇錢睇你點貪。」說罷便哈哈大笑。他指因娘親是個女強人,而他喜歡一些有性格及事業心的女仔,才可互相成長和進步。

至於「二世祖」稱呼,他沒有介懷。媽媽曾想為兒子鋪路,加入一些富二代的組織,他坦言︰「阿娘有問我去唔去啲『二世祖』會,其實我去過獅子會,做咗7年服務長者。過程中,不停灌輸要請食飯、捐幾多錢、籌幾多,呢個唔係我囉!」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner