盧覓雪舌戰玻璃朱網民群情洶湧 雪雪:如果鬥P圖我輸

更新時間 (HKT): 2021.05.24 18:11

ViuTV真人騷《ERROR自肥企画》雖已播完,但觀眾仍然回味無窮,反而TVB《開心大綜藝》就負評如潮,加上MIRROR和ERROR的爆紅,人氣力壓TVB一眾小生花旦,明顯一台獨大的日子已成過去!港台《視點31》在官網出LIVE預告,明天邀請資深傳媒人盧覓雪和藝人朱庭萱出席直播討論,題目為「娛樂為甚麼?」就兩大電視台近來鬥綜藝、鬥娛樂作出辯論。

緊貼時代脈搏的盧覓雪,曾在商台節目《在晴朗的一天出發》指鏡粉後援會好勁,現今香港好少見,又出post撐193新歌,相反因撐警言論稍有人識的46歲「玻璃朱」朱庭萱,就批評MIRROR「行落旺角大把」,更多次留言維護TVB的老友。

港台宣傳預告一出,引發網民熱烈討論,有不滿港台將玻璃朱冠上「藝人」身份,又取笑宣傳相上的玻璃朱「P到外星人咁,唔P唔見得人咩」,網民群情洶湧為雪雪打氣:「請盧覓雪幫我哋狠狠鞭呢條九唔搭八嘅朱X」、「點解盧覓雪咁出名要同條唔知咩女辯論嘅」、「翠蓮要fight低隻美圖獸獸」、「雪雪姐半場勝(10mins內)賠率有冇1.5倍呀」、「雪雪唔講得粗口,威力得返40%,不過應該夠晒做,唔該同我寸爆佢」。

對於網民力撐盧覓雪可以K.O.玻璃朱,盧覓雪在電話回覆《蘋果》:「大佬,我而家又唔係去打擂台,又唔係去女子泥漿摔角,使唔使要K.O.佢唧,我覺得呢類節目都係理性討論,將自己睇法講出嚟,《城市論壇》你認為邊個K.O.邊個呀 ?有時唔係咁諗;如果玩鬥P圖我輸咗,因為我唔識P圖,哈哈!但如果大家將理性睇法攞出嚟討論,我覺得有得交流吓,但我唔會用鬧爆,而家唔係潑婦罵街,我平時鬧人好渣,我唔識鬧交,只係識理性討論。而家要落街跑三個圈,為了你哋認為嘅『擂台大戰』,明日上去之前打場拳,操fit自己,哈哈!」

玻璃朱:取消facebook直播

而玻璃朱中午在facebook留言:「剛收到港台消息,取消facebook直播,改由晚上8點電視轉播無刪剪版頭7分鐘。足版本過兩日放facebook,港台唔係覺得我會爆粗呀?其實我都唔係好願意去,但主持多次邀請,同講明可以理性討論唔係駡戰。最重要係今次topic希望可以幫這兩年受TVB網上欺凌嘅藝員同客戶討回公道。大家到時留言支持下!」

另外,盧覓雪好友杜汶澤晚上亦忍唔住在facebook出post,並貼有為雪雪P成「蛇精女」頭像,他留言道:「雪雪,既然人哋都P都飛起,你無奶油唔一齊P㗎?玩雙P呀嘛!你有冇禮貌㗎?唉,我嚟嘞!」十分抵死!

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

娛聞樂陪你走遍全球追星,即Like「娛果」FB 專頁!
BannerBanner