旨呈參加《造星III》被揭10億太子爺身份 母曾裕阻歌星夢畀8千月薪

更新時間 (HKT): 2021.05.24 00:30

人生想怎樣行,自己有權選擇,但父母永遠都冇得揀。

今年36歲的旨呈(鄺旨呈),2010年與志同道合的朋友組成享樂團,至今作品不算多。去年11月他參加《全民造星III》於40強止步,可是他的家底,從此曝光。旨呈的媽媽是上市公司現代健康科技(前稱現代美容)創辦人兼主席曾裕,其身家超過10億。被揭底細的旨呈並不介意,反而豁出去,「發明星夢?係俾人笑,但笑得幾耐呀!不如做好自己。」媽媽為阻兒子做音樂,曾開出月薪20萬利誘他返公司工作,但為追夢的旨呈坦言︰「我情願揀8千蚊月薪。」

太子爺身份曝光

去年11月旨呈參加《造星III》,沒料到其太子爺身份被翻出,「初時係抗拒,但始終要面對,我唔係出嚟要威,要人奉承我。好多人對我屋企背景,都歸類係我發明星夢,阿媽攞錢幫你咪得?只係娘親冇掟過錢,如果佢攞幾百萬畀我搞紅館騷、買紅隧廣告位,正呀!但我冇咁諗過。」有網民指他因生於富裕家庭,才可追夢,他坦言︰「講得啱呀,唔係我就要去搵食,我知夢想好難擁有,難得有機會去追,追唔追到,起碼自己無悔。」

他認為每個人都應該有夢想,無論有錢定冇錢都要有夢想,而參加《造星》他只想證明自己。事實上他參加《造星》後,便接了節目《學神出沒注意》和戚其義新劇《逐流時代》,他說︰「際遇就係咁,一條路冇咗就會有另一條路出現,所以我更要比人哋200%努力。阿娘由一張美容床起家,我希望自己由一支咪起家。」

月薪得8千

媽媽是女強人,而旨呈想追夢,當然不被媽媽支持和認同,「娘親係好反對,佢講得好啱,問我『你有冇劉德華咁叻?有冇我搵咁多錢?你一個騷收幾多錢?你做義工呀?有酬勞幾時畀家用?』佢成日都『錐』我,我就要更加努力。(鞭策你?)鞭咗我好多年,冇佢冇我。」提及他的媽媽有否說過一些令他傷心的說話,他坦言︰「有次佢話,如果唔玩享樂團,佢每月畀20萬我,唔係就只有8千蚊,最終我揀咗8千蚊。佢唔係想令我難堪,係想我面對現實。」

他曾試過銀包沒錢,聽起來會被質疑,他說着︰「疫情下美容界停業,娘親冇辦法要員工停薪,天子與庶民同罪,停業咁多個月,我就捱足咁多個月,之前儲落十幾萬都慢慢搣。聽落冇人信呢?屋企有錢唔一定生活有錢。」

在旨呈口中不時提起「娘親」,談到母子關係,他坦言不錯︰「佢好錫我,管教非常嚴,外界以為我有好豐富嘅物質,偏偏佢畀我嘅人工、生活費,同普通人冇分別,可能佢唔想個仔有毛有翼。」問他媽媽控制慾是否很強?他認同的說︰「強㗎!佢對我好嚴。」母子間總有一些分歧,譬如他想追音樂夢,「追夢,對住娘親就唔可以咁講,鬧硬,佢問我點解參加《造星》?我話已經拍完,佢嬲到反晒白眼。」他指音樂可以找到自己,亦可以自己話事,「呢個係我最開心嘅興趣,會堅持做落去。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner