盧覓雪舌戰前夕林海峰打氣笑P圖 玻璃朱曾自稱軟硬超級fans客串MV

更新時間 (HKT): 2021.05.25 12:18

人脈比知識更重要,46歲「玻璃朱」朱庭萱原本寂寂無名,靠着林峯契家姐、黃宗澤前女友、姚子羚閨密等「身份」,又不時在網上晒自己跟不同藝人合照,努力喺娛圈攀關係,招數頗多,博出位程度拍得住「清泉競徽」,玻璃朱早前靠惹火頭批MIRROR「行落旺角大把」,又指鏡粉是井底之蛙,令人再次注意,雖然網民普遍唔知道佢係乜水,但仍然自覺有知名度,喺網上「圍爐」稱自己唔想幫MIRROR宣傳。

終於捱到一個機會,港台官網昨日宣佈搵咗資深傳媒人盧覓雪將於今晚8點與「藝人」朱庭萱在節目《視點31》舌戰,題目為「娛樂為甚麼?」就兩大電視台近來鬥綜藝、鬥娛樂作出辯論,該宣傳海報更惹來網民戥盧覓雪不值,有人不滿港台竟然將玻璃朱冠上「藝人」身份嚟探討香港娛圈,又取笑宣傳相上嘅玻璃朱「P到外星人咁」,而盧覓雪卻用真面目示人。

盧覓雪今午在FB貼出打拳pose,並留言:「今日戰衣!佢哋問我做乜成身藍色,其實我就冇話刻意着咩色,主要都係上鏡要大方端莊,話晒上電視冇得執㗎嘛,另外舒適度都好重要,方便我隨時大動作,你知啦拳腳無眼!」

林海峰打氣:今早留力

今早商台節目《在晴朗的一天出發》開咪時,林海峰同阮子健忍唔住為盧覓雪打氣,叫佢今早要留力,又指今晚會收睇節目以示支持。阮子健在《晴朗》問「識唔識P圖」,盧覓雪笑說:「冇!因為我本人唔識P圖。」講講吓林海峰插嘴:「我就唔會同你爭辯,我覺得我實輸,好在冇請我。」盧覓雪即互笠高帽:「請你,我唔敢去啦!」

講到人類「出廠」已設定,根據生理時鐘就會變成咩人,佢哋又再扯開話題,盧覓雪反問:「啲人P圖改變晒自己。」阮子健接着講可能覺得內心唔好受就去P圖,林海峰即笑說:「留力!留力!定啲嚟,留力!Good Show!唔好消耗體能,如果唔係等陣表現唔好,唔好chur得佢咁勁,今日已經盡量就住。」

再講下一個話題,當盧覓雪講到為小朋友健康就唔好畀手機,林海峰搞鬼問:「係唔係驚P圖?」盧覓雪立刻爆笑:「梗係啦!第一樣就驚呢個,哈哈!真係你都講得出個重點。」林海峰解釋:「係怕上癮,返唔到轉頭,夠啦!今日要留力,為你打氣,比賽前為你撥扇、淋水,拎棚假牙嚟。加油呀!聽朝先再講過。」

軟硬超級fans

聽完「硬天師」林海峰咁講,睇怕「玻璃朱」會好傷心,畢竟佢曾自稱係「軟硬超級fans」,2013年更為軟硬天師《山頂嘅朋友》MV客串,出鏡4秒,又曾經於2017年獲林公子邀請出席《在晴朗的一天出發》做嘉賓,之後又去過2018年更出席「903在晴朗的一天出發」團年飯噃!

其實玻璃朱一向好喜歡建立關係,當年就係佢喺網誌自爆跟黃宗澤(Bosco)拍拖五個月,稱被Bosco傷得很深,此外,佢更自稱跟圈中好多藝人份屬好友,林峯、陳凱琳、龔嘉欣、姚子羚等。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner